കൊച്ചി: മുന്‍ എംഎല്‍എയും മുസ്ലീം ലീഗ് നേതാവുമായ കെ എം ഷാജിക്കെതിരായ അനധികൃത സ്വത്ത് സമ്പാദനക്കേസില്‍ വിജിലന്‍സിന് തിരിച്ചടി. കെ എം ഷാജിയില്‍ നിന്ന് പിടിച്ചെടുത്ത 47,35000 രൂപ തിരികെ നല്‍കണമെന്ന് ഹൈക്കോടതി ഉത്തരവിട്ടു. റെയ്ഡില്‍ പിടിച്ചെടുത്ത പണം തിരികെ നല്‍കണമെന്ന് ആവശ്യപ്പെട്ട് കെ എം ഷാജി സമര്‍പ്പിച്ച ഹര്‍ജിയിലാണ് ഹൈക്കോടതി ഉത്തരവ്. തെരഞ്ഞെടുപ്പ് പ്രവര്‍ത്തനത്തിനായി പിരിച്ച പണമാണ് വിജിലന്‍സ് കൊണ്ടുപോയതെന്നാണ് കെ എം ഷാജിയുടെ വാദം. പണം തിരികെ നല്‍കണമെന്ന ഷാജിയുടെ ആവശ്യം നേരത്തെ കോഴിക്കോട് വിജിലന്‍സ് കോടതി തളളിയിരുന്നു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
സിപിഎം പ്രവര്‍ത്തകന്റെ പരാതിയിലാണ് കെ എം ഷാജിക്കെതിരെ വിജിലന്‍സ് അനധികൃത സ്വത്ത് സമ്പാദനക്കേസ് രജിസ്റ്റര്‍ ചെയ്തത്. തുടര്‍ന്ന് അഴീക്കോട്ടെ വസതിയില്‍ നടത്തിയ റെയ്ഡിലാണ് 47 ലക്ഷം രൂപ പിടിച്ചെടുത്തത്. കോഴിക്കോട്ടെ ഒന്നരക്കോടി രൂപയുടെ വീട് നിര്‍മ്മിച്ചത് അനധികൃത സ്വന്ത് സമ്പാദനത്തിലൂടെയാണെന്നായിരുന്നു സിപിഎം പ്രവര്‍ത്തകന്റെ ആരോപണം. കേസിലെ തുടര്‍നടപടികള്‍ ഹൈക്കോടതി നേരത്തെ സ്‌റ്റേ ചെയ്തിരുന്നു. അതിനുപിന്നാലെയാണ് പിടിച്ചെടുത്ത പണം വിട്ടുനല്‍കണമെന്ന് ആവശ്യപ്പെട്ട് ഷാജി കോടതിയെ സമീപിച്ചത്. ബാങ്ക് ഗ്യാരണ്ടി വച്ചുകൊണ്ട് പണം തിരികെ കൊടുക്കാനാണ് കോടതിയുടെ നിര്‍ദേശം.
