കണ്ണൂര്‍: വൈദേകം റിസോര്‍ട്ടുമായി ബന്ധപ്പെട്ട വിവാദങ്ങളില്‍ പ്രതികരിച്ച് എല്‍ ഡി എഫ് കണ്‍വീനര്‍ ഇ പി ജയരാജന്‍. വിവാദങ്ങളെല്ലാം ജനങ്ങള്‍ക്ക് വിട്ടുകൊടുക്കുകയാണെന്നും ജനങ്ങള്‍ തീരുമാനിക്കട്ടെയെന്നും ഇ പി ജയരാജന്‍ പറഞ്ഞു. ഇതിനുമുന്‍പും പല വികസന പ്രവര്‍ത്തനങ്ങള്‍ക്കും താന്‍ നേതൃത്വം നല്‍കിയിട്ടുണ്ട്. ഈ വിവാദത്തിന്‍റെ അടിസ്ഥാനം തനിക്കറിയില്ല. വിസ്മയ പാര്‍ക്ക്, കണ്ടല്‍ പാര്‍ക്ക്, പാപ്പിനിശേരി ഹോമിയോ ആശുപത്രി, പരിയാരത്തെ കാലിത്തീറ്റ നിര്‍മാണ ഫാക്ടറിയൊക്കെ താന്‍ മുന്‍കൈ എടുത്തവയില്‍ ഉള്‍പ്പെടും. ഇതെല്ലാം ജനങ്ങള്‍ക്കറിയാമെന്നും ഇ പി ജയരാജന്‍ ട്വന്‍റി ഫോറിനോട് പറഞ്ഞു.
അതേസമയം, ഇപി ജയരാജനെതിരെ ഉയര്‍ന്നുവന്നിരിക്കുന്ന ആരോപണം സിപിഎം ചര്‍ച്ച ചെയ്തു പരിഹരിക്കട്ടെയെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞു. പ്രശ്നങ്ങള്‍ പരിഹരിക്കാനുള്ള പക്വത സിപിഎമ്മിനുണ്ട്. മാധ്യമ വാര്‍ത്തകളുടെ അടിസ്ഥാനത്തില്‍ ഇത്തരം കാര്യങ്ങളോട് പ്രതികരിക്കുന്നത് ശരിയല്ലെന്നും കാനം രാജേന്ദ്രന്‍ കൂട്ടിച്ചേര്‍ത്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഇ പി ജയരാജനെതിരെ സംസ്ഥാന സമിതി യോഗത്തില്‍ പി ജയരാജന്‍ സാമ്പത്തിക ക്രമക്കേട് ആരോപിച്ചുവെന്ന് കഴിഞ്ഞ ദിവസം വാര്‍ത്തകള്‍ പുറത്തുവന്നിരുന്നു. കണ്ണൂരിലെ ആയുര്‍വേദ റിസോര്‍ട്ടിന്റെ പേരില്‍ പണമുണ്ടാക്കിയെന്നാണ് ആരോപണം. രേഖാമൂലം ഉന്നയിച്ചാല്‍ ആരോപണം അന്വേഷിക്കുമെന്ന് സംസ്ഥാന സെക്രട്ടറി എം വി ഗോവിന്ദന്‍ യോഗത്തില്‍ വ്യക്തമാക്കിയെന്നും രേഖാമൂലം പരാതി നല്‍കാമെന്ന് പി ജയരാജന്‍ യോഗത്തെ അറിയിച്ചതായും മാധ്യമങ്ങള്‍ റിപ്പോര്‍ട്ട് ചെയ്തിരുന്നു.
