ലക്നൗ: ലഖിംപൂരില് കര്ഷകരെ വണ്ടിയിടിച്ച് കൊലപ്പെടുത്തിയ കേന്ദ്രമന്ത്രി അജയ് മിശ്രയുടെ മകന് ആശിഷ് മിശ്രയുടെ ജാമ്യം റദ്ദാക്കി സുപ്രീംകോടതി. ആശിഷ് മിശ്ര ഒരാഴ്ച്ചയ്ക്കകം കീഴടങ്ങണമെന്നും കോടതി ഉത്തരവിട്ടു. ചീഫ് ജസ്റ്റിസ് എന് വി രമണ അധ്യക്ഷനായ ബെഞ്ചിന്റേതാണ് വിധി. ഫെബ്രുവരി പത്തിന് അലഹബാദ് ഹൈക്കോടതി ആശിഷ് മിശ്രയ്ക്ക് ജാമ്യം അനുവദിച്ചിരുന്നു. എന്നാല് ലഖിംപൂര് ഖേരിയില് കൊല്ലപ്പെട്ട കര്ഷകരുടെയും മാധ്യമപ്രവര്ത്തകന്റെയും കുടുംബം ഇയാളുടെ ജാമ്യം റദ്ദാക്കണമെന്നാവശ്യപ്പെട്ട് സുപ്രീംകോടതിയെ സമീപിക്കുകയായിരുന്നു.
കഴിഞ്ഞ വര്ഷം ഒക്ടോബര് മൂന്നിനാണ് ഉത്തര്പ്രദേശ് ഉപമുഖ്യമന്ത്രി കേശവ് പ്രസാദ് മൗര്യയുടെ സന്ദര്ശനത്തിനുപിന്നാലെ ലഖിംപൂര് ഖേരിയില് കര്ഷകര് പ്രതിഷേധിച്ചത്. സമാധാനപരമായി പ്രതിഷേധ ജാഥ നടത്തുകയായിരുന്ന കര്ഷകര്ക്കിടയിലേക്ക് ആശിഷ് മിശ്രയും സംഘവും വാഹനമിടിച്ച് കയറ്റുകയായിരുന്നു. സംഭവത്തില് നാല് കര്ഷകരും ഒരു മാധ്യമപ്രവര്ത്തകനുമുള്പ്പെടെ ഒന്പതുപേര് കൊല്ലപ്പെട്ടിരുന്നു. കര്ഷകരെ ഇടിച്ചുതെറിപ്പിച്ച വാഹനത്തില് ആശിഷ് മിശ്രയുണ്ടായിരുന്നെന്നും ഇയാള്തന്നെയാണ് കര്ഷകര്ക്കുനേരെ വെടിയുതിര്ത്തതെന്നും യുപി പൊലീസിന്റെ പ്രത്യേക അന്വേഷണ സംഘം സമര്പ്പിച്ച എഫ് ഐ ആറില് നിന്ന് വ്യക്തമാണ്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ലഖിംപൂര് ഖേരി കേസില് അയ്യായിരം പേജുളള കുറ്റപത്രമാണ് അന്വേഷണ സംഘം സമര്പ്പിച്ചത്. നേരത്തെ, നിരവധി തെളിവുകളുണ്ടായിട്ടും ആശിഷ് മിശ്രയെ അറസ്റ്റ് ചെയ്യാത്തതില് യുപി പൊലീസിനെതിരെ വലിയ പ്രതിഷേധമുയര്ന്നിരുന്നു. തുടര്ന്ന് 12 മണിക്കൂര് ചോദ്യംചെയ്തതിനുശേഷം ആശിഷ് മിശ്രയെ പൊലീസ് അറസ്റ്റ് ചെയ്യുകയായിരുന്നു. ലഖിംപൂര് ഖേരിയില് കര്ഷകര് കൊല്ലപ്പെടുമ്പോള് താന് സ്ഥലത്തില്ലായിരുന്നു എന്നായിരുന്നു ആശിഷ് അന്വേഷണ സംഘത്തോട് പറഞ്ഞത്. എന്നാല് ടവര് ലൊക്കേഷന് പരിശോധിച്ചപ്പോള് ഇയാള് പറഞ്ഞത് കളളമാണെന്ന് തെളിയുകയായിരുന്നു.