പാലക്കാട്: ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ പാലക്കാട് വന്നുപോയതിന്റെ പിന്നാലെയാണ് എസ്ഡിപിഐ നേതാവ് സുബൈര്‍ കൊല്ലപ്പെട്ടതെന്ന് സിപിഐഎം ജില്ലാ സെക്രട്ടറി സുരേഷ് ബാബു. 'സുബൈര്‍ കൊല്ലപ്പെടുന്നതിന്റെ രണ്ട് ദിവസം മുമ്പാണ് സുരേന്ദ്രന്‍ ആലത്തൂരിലെ പ്രവര്‍ത്തകന്റെ വീട്ടില്‍ വന്നത്. സുരേന്ദ്രന്‍ വന്നുപോയതിന്റെ രണ്ടാമത്തെ ദിവസമാണ് കൊലപാതകം നടക്കുന്നത്. സ്വാഭാവികമായും ആര്‍ക്കും മനസിലാകും. ഈ കൊലപാതകത്തിന് പിന്നില്‍ നേതൃത്വത്തിന് പങ്കുണ്ടോ എന്ന്. പങ്കുണ്ടെങ്കില്‍ അത് അന്വേഷിക്കണം. ആസൂത്രിതമായ കൊലപാതകങ്ങളാണ് നടന്നിട്ടുള്ളത്'- സുരേഷ് ബാബു പറഞ്ഞു.
അതിനിടെ, സുബൈര്‍ വധക്കേസിലെ പ്രതികളെ തിരിച്ചറിഞ്ഞിട്ടുണ്ടെന്നും ഇവരെ ഉടന്‍ അറസ്റ്റ് ചെയ്യുമെന്നും എഡിജിപി വിജയ് സാഖറെ പറഞ്ഞു. ചിലര്‍ നിരീക്ഷണത്തിലാണ്. ചിലര്‍ കസ്റ്റഡിയിലുണ്ട്. ഇവരെ ചോദ്യംചെയ്യുന്നത് തുടരുകയാണ്. അന്വേഷണം നടക്കുന്നതിനാല്‍ ഇവരുടെ പേര് ഇപ്പോള്‍ വെളിപ്പെടുത്തുന്നില്ലെന്നും എഡിജിപി അറിയിച്ചു. പാലക്കാട് നടന്ന രണ്ട് കൊലപാതകങ്ങളും കൃത്യമായ ആസൂത്രണത്തോടെയാണ് നടപ്പാക്കിയത്. ആസൂത്രിത കൊലപാതകങ്ങള്‍ തടയുക പ്രയാസമാണ് എന്നും അദ്ദേഹം പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
പാലക്കാട്ടെ രണ്ട് കൊലപാതകങ്ങളും രണ്ട് പ്രത്യേക സംഘങ്ങളായാണ് അന്വേഷിക്കുന്നത്. ആര്‍എസ്എസ് നേതാവ് ശ്രീനിവാസന്‍ വധത്തില്‍ പ്രതികള്‍ക്കായി അന്വേഷണം നടക്കുന്നുണ്ട്. സിസിടിവി ദൃശ്യങ്ങളുടെ അടിസ്ഥാനത്തില്‍ കുറച്ചുപേരുടെ വിവരങ്ങള്‍ ലഭിച്ചിട്ടുണ്ട്. കേസന്വേഷണത്തില്‍ നല്ല പുരോഗതിയുണ്ട്. രണ്ട് കൊലപാതകങ്ങളിലും ഗൂഢാലോചന നടന്നിട്ടുണ്ട്. ഗൂഢാലോചനയ്ക്ക് പിന്നിലുള്ളവരെ കണ്ടെത്തും. കൊലപാതകം നടത്തിയവര്‍ വെറും കാലാള്‍പ്പടകള്‍ മാത്രമാണെന്നും എഡിജിപി അറിയിച്ചു.
