കോട്ടയം: കോട്ടയം നഗരസഭയില്‍ ഭരണം നിലനിര്‍ത്തി യുഡിഎഫ്. തെരഞ്ഞെടുപ്പില്‍ യുഡിഎഫ് സ്ഥാനാര്‍ത്ഥി ബിന്‍സി സെബാസ്റ്റ്യന് 22 വോട്ടുകളും എല്‍ഡിഎഫ് സ്ഥാനാര്‍ത്ഥി ഷീജാ അനിലിന് 21 വോട്ടുകളുമാണ് ലഭിച്ചത്. ഇത് സത്യത്തിന്റെയും നന്മയുടെയും വിജയമാണെന്നും അട്ടിമറി നടത്താന്‍ എല്‍ഡിഎഫും ബിജെപിയും ശ്രമിച്ചെങ്കിലും അന്തിമ വിജയം യുഡിഎഫ് നേടിയെന്നും ബിന്‍സി സെബാസ്റ്റ്യന് പറഞ്ഞു. കക്ഷി രാഷ്ട്രീയം നോക്കാതെ എല്ലാവരും ഒറ്റക്കെട്ടായി കോട്ടയം നഗരസഭയുടെ വികസനത്തിനായി പ്രവര്‍ത്തിക്കുമെന്നും ബിന്‍സി കൂട്ടിച്ചേര്‍ത്തു.
തെരഞ്ഞെടുപ്പില്‍ യുഡിഎഫ് വിജയിച്ചതോടെ ബിന്‍സി നഗരസഭാ ചെയര്‍പേഴ്‌സണായി തുടരും. ഇടതു-വലതു മുന്നണികള്‍ക്ക് തുല്യബലമാണ് കോട്ടയം നഗരസഭയില്‍. ഭരണസ്തംഭനം ചൂണ്ടിക്കാട്ടി എല്‍ഡിഎഫ് ബിജെപിയുടെ പിന്തുണയോടെ കൊണ്ടുവന്ന അവിശ്വാസപ്രമേയം പാസായതോടെയാണ് നഗരസഭയില്‍ വീണ്ടും തെരഞ്ഞെടുപ്പിന് കളമൊരുങ്ങിയത്.
യുഡിഎഫിന് 21, എല്‍ഡിഎഫിന് 22, ബിജെപിക്ക് 8 എന്നിങ്ങനെയായിരുന്നു നഗരസഭയിലെ അംഗബലം. കോണ്‍ഗ്രസ് വിമതയായി മത്സരിച്ച ബിന്‍സി സെബാസ്റ്റിയന്‍ യുഡിഎഫിനൊപ്പം ചേര്‍ന്നതോടെ കോണ്‍ഗ്രസിന്റെ അംഗബലം 22 ആവുകയായിരുന്നു. എല്‍ഡിഎഫിന്റെ ഒരു അംഗത്തിന് ആരോഗ്യകാരണങ്ങളാല്‍ തെരഞ്ഞെടുപ്പില്‍ പങ്കെടുക്കാന്‍ കഴിഞ്ഞില്ല. ഇതാണ് യുഡിഎഫിന്റെ വിജയത്തിന് വഴിതെളിച്ചത്.
