ഡല്‍ഹി: കൊവിഡ് സാഹചര്യം വിലയിരുത്താനായി ഒരു സര്‍വ്വകക്ഷി യോഗം വിളിക്കണമെന്ന് കോണ്‍ഗ്രസ് അധ്യക്ഷ സോണിയ ഗാന്ധി പ്രധാനമന്ത്രിയോട് ആവശ്യപ്പെട്ടു. കൊവിഡ് സ്ഥിതിഗതികള്‍ ചര്‍ച്ച ചെയ്യാനായി നടന്ന കോണ്‍ഗ്രസ് പാര്‍ലമെന്റ്‌റി പാര്‍ട്ടിയുടെ വെര്‍ച്വല്‍ യോഗത്തില്‍ സംസാരിക്കുകയായിരുന്നു സോണിയ ഗാന്ധി.
മാരകമായ ഒരു വൈറസിന്റെ പിടിയിലാണ് ഇന്ത്യ. ദിനംപ്രതി ആയിരക്കണക്കിന് ആളുകള്‍ മരിക്കുന്നു. ദശലക്ഷക്കണക്കിന് ആളുകള്‍ക്ക് മരുന്ന്, വാക്‌സിന്‍,ഓക്‌സിജന്‍ തുടങ്ങി ജീവന്‍ നിലനിര്‍ത്താനുളള അടിസ്ഥാന വിഭവങ്ങള്‍ പോലും ലഭിക്കാത്ത സാഹചര്യമാണ് നിലവില്‍ രാജ്യത്തുളളത്.
ജനങ്ങള്‍ ചികിത്സയ്ക്കായി റോഡുകളിലും വാഹനങ്ങളിലുമായി കാത്തുനില്‍ക്കുന്ന കാഴ്ച്ച ഹൃദയഭേദകമാണ്. എന്നാല്‍ മോദി സര്‍ക്കാര്‍ ജനങ്ങളുടെ കഷ്ടതകള്‍ കുറയ്ക്കാനുളള നടപടികള്‍ എടുക്കുന്നില്ല. അവര്‍ ജനങ്ങളോടുളള ഉത്തരവാദിത്വവും കടമയും മറക്കുകയാണ്. സര്‍ക്കാര്‍ പരാജയപ്പെട്ടിട്ടില്ല അവര്‍ നമ്മുടെ രാജ്യത്തെ ജനങ്ങളെയാണ് പരാജയപ്പെടുത്തിയതെന്നും സോണിയ ഗാന്ധി പറഞ്ഞു.
ഇത് സര്‍ക്കാരിനെതിരെയുളള യുദ്ധമല്ല മറിച്ച് കൊവിഡിനെതിരെയുളള യുദ്ധമാണ്. ഈ യുദ്ധത്തില്‍ രാഷ്ട്രീയമില്ലെന്നും അവര്‍ കൂട്ടിച്ചേര്‍ത്തു.
