സംസ്ഥാനത്ത് കൊവിഡ് വ്യാപനം രൂക്ഷമായ സാഹചര്യത്തിൽ തിരുവനന്തപുരം ജില്ലയിൽ നിന്നും തമിഴ്നാട്ടിലേക്കുള്ള റോഡുകൾ അടച്ചു. ജില്ലാ ഭരണകൂടത്തിന്റെ നിർദ്ദേശ പ്രകാരം തമിഴ്നാട് പൊലീസാണ് റോഡുകൾ അടച്ചത്. ജില്ലയിൽ നിന്ന് തമിഴ്നാട്ടിലേക്കുള്ള 15 ഓളം റോഡുകളിലാണ് ബാരിക്കേകൾ സ്ഥാപിച്ചത്. തിരുവനന്തപുരം- കന്യാകുമാരി ദേശീയ പാതയും അടച്ചിരിക്കുകയാണ്. കൊവിഡ് നെഗറ്റീവ് സർട്ടിഫിക്കറ്റ് ഉള്ളവരെ മാത്രമാണ് തമിഴ്നാട്ടിലേക്ക് കടത്തിവിടുന്നത്. ഇ പാസ് ഉള്ളവർക്കും അതിർത്തി കടക്കാൻ അനുവദമുണ്ട്.
അമ്പൂരി, വെള്ളറട, പനച്ചമൂട്, കണ്ണുവാമൂട്, ഉച്ചക്കട പൊഴിയൂർ എന്നീ അതിർത്തികളിലൂടെ ആരെയും തമിഴ്നാട്ടിലേക്ക് പോകാൻ അനുവിദിക്കുന്നില്ല. അതിർത്തി അടച്ചത് അറിയാതെ നിരവധി യാത്രക്കാർ എത്തുന്നുണ്ട്. വാഹനങ്ങളിൽ എത്തുന്നവരെ മടക്കി അയക്കുന്നുണ്ട്. അതിർത്തി അടച്ചത് സംബന്ധിച്ച് തിരുവനന്തപുരം ജില്ലാ ഭരണകൂടത്തിന് ഔദ്യോഗിക അറിയിപ്പൊന്നും കിട്ടിയിട്ടില്ല. അതേ സമയം വിഷയത്തില് ഇടപെടണമെന്ന് വിവിധ കോണുകളിൽ നിന്നും ആവശ്യം ഉയർന്നിട്ടുണ്ട്.
