ഡല്ഹി: തലസ്ഥാനത്ത് രണ്ടുമാസത്തിലേറേയായി കൊടും തണുപ്പിനെയും പ്രതികൂല കാലാവസ്ഥയെയും വകവയ്ക്കാതെ പ്രതിഷേധിക്കുന്ന പ്രായമായ കര്ഷകര്ക്ക് ആശ്വാസമായി സിംഘു അതിര്ത്തിയില് പുതുതായി ആരംഭിച്ച താല്ക്കാലിക മസാജ് സെന്റര്. കാല് മുട്ട് വേദന, നടു വേദന തുടങ്ങിയ ശാരീരിക അസ്വസ്തതകള് അനുഭവിക്കുന്ന പ്രായമായ കര്ഷകര്ക്കായാണ് ഹര്പ്രീത് സിംഗെന്ന ഇരുപത്തിരണ്ടുകാരന് താല്ക്കാലിക മസാജ് സെന്റര് ഒരുക്കിയിരിക്കുന്നത്.
പ്ലാസ്റ്റിക് കസേരകള്, പായകള് തുടങ്ങിയവ ഉപയോഗിച്ചാണ് സെന്റര് ഒരുക്കിയിരിക്കുന്നത്. പഞ്ചാബിലെ സാധാരണക്കാര് അവരുടെ വീടുകളില് ഉണ്ടാക്കുന്ന എണ്ണയാണ് മസാജ് ചെയ്യുന്നതിനായി ഉപയോഗിക്കുന്നത്. പുലര്ച്ചെ അഞ്ചു മണിക്ക് തുറക്കുന്ന മസാജ് സെന്റര് വൈകുന്നേരം അഞ്ച് മണിവരെയാണ് പ്രവര്ത്തിക്കുക. ഇതിനെ ഒരു സേവനമായാണ് കാണുന്നത്, വരുന്ന ആളുകളുടെ എണ്ണം നോക്കാറില്ല, എങ്കിലും ദിനംപ്രതി എണ്ണം കൂടിവരുന്നുണ്ടെന്നും ഹര്പ്രീത് സിംഗ് പറഞ്ഞു.
ഉടനൊന്നും അവസാനം കാണാനിടയില്ലാത്ത സമരത്തില് പങ്കെടുക്കുന്ന പ്രായമായവരുടെ എണ്ണം കൂടിക്കൊണ്ടിരിക്കുകയാണ്. ടെന്റുകളില് രണ്ടുമാസത്തിലേറേയായി താമസിക്കുന്ന പ്രായമായവരെ കാലാവസ്ഥ വളരെ പ്രതികൂലമായാണ് ബാധിക്കുന്നത്. സമരഭൂമിയിലെ ഭൂരിപക്ഷം പേരും അമ്പത് മുതല് അറുപത് വയസുവരെ പ്രായമുളളവരാണ്.