ഡല്‍ഹി: കര്‍ഷകര്‍ ഡല്‍ഹിയിലെത്തുന്നത് തടയാന്‍ കേന്ദ്രസര്‍ക്കാര്‍ നീക്കം. ഡല്‍ഹിയിലേക്കെത്തുന്ന ട്രെയിനുകള്‍ക്ക് നിയന്ത്രണമേര്‍പ്പെടുത്തി. പഞ്ചാബില്‍ നിന്നുളള ട്രെയിന്‍ റെവാടിയയിലേക്ക് വഴിതിരിച്ചുവിട്ടു. സമര സമിതിയുടെ ആഹ്വാന പ്രകാരം കേന്ദ്രത്തിനെതിരായ കാര്‍ഷിക സമരത്തില്‍ പങ്കെടുക്കാനായി ഡല്‍ഹിയിലേക്ക് വരുന്ന കര്‍ഷകര്‍ കയറിയ ട്രെയിനുകളാണ് തിരിച്ചുവിടുന്നതെന്ന് കര്‍ഷക സംഘടനകള്‍ ആരോപിച്ചു.
അതേസമയം കാര്‍ഷിക നിയമങ്ങള്‍ക്കെതിരായ സമരം കടുപ്പിക്കാനൊരുങ്ങുകയാണ് കര്‍ഷകര്‍. ഫെബ്രുവരി ആറിന് രാജ്യവ്യാപകമായി റോഡുകള്‍ തടയുമെന്ന് സംയുക്ത കിസാന്‍ മോര്‍ച്ച പ്രഖ്യാപിച്ചു. സമരഭൂമിയില്‍ ഇന്റര്‍നെറ്റ് വിച്ഛേദിച്ചതും ജലവിതരണം മുടക്കിയതുമുള്‍പ്പെടെയുളള കേന്ദ്രത്തിന്റെ പീഡനങ്ങളില്‍ പ്രതിഷേധിച്ച് സംസ്ഥാന, ദേശീയ ഹൈവേകള്‍ മൂന്നുമണിക്കൂര്‍ ഉപരോധിക്കുമെന്ന് കര്‍ഷകര്‍ വ്യക്തമാക്കി. ഫെബ്രുവരി ആറിന് ഉച്ചയ്ക്ക് പന്ത്രണ്ട് മുതല്‍ മൂന്ന് മണിവരെയാണ് റോഡുകള്‍ ഉപരോധിക്കുക.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
കേന്ദ്ര ബജറ്റില്‍ കര്‍ഷകരെ അവഗണിച്ചെന്നും കര്‍ഷകസംഘടനകള്‍ ആരോപിച്ചു. അതേസമയം, വിവാദ കാര്‍ഷിക നിയമങ്ങള്‍ക്കെതിരായ രാജ്യത്തെ കര്‍ഷകരുടെ പ്രതിഷേധം 69 ദിവസം കടന്നു. നിയമങ്ങള്‍ പിന്‍വലിക്കാതെ പിന്നോട്ടില്ലെന്ന നിലപാടില്‍ ഉറച്ചുനില്‍ക്കുകയാണ് കര്‍ഷകര്‍.
