ചെന്നൈ: ആനയെ തീ കൊളുത്തി കൊന്നതിനെത്തുടര്‍ന്ന് റിസോര്‍ട്ടുകള്‍ക്കെതിരെ കര്‍ശന നടപടിയുമായി തമിഴ്‌നാട് ഭരണകൂടം. ലൈസന്‍സും മറ്റ് രേഖകളുമില്ലാത്ത എല്ലാ റിസോര്‍ട്ടുകളും പൂട്ടാനാണ് ഭരണകൂടത്തിന്റെ ഉത്തരവ്. തദ്ദേശസ്ഥാപനങ്ങള്‍ക്ക് റിസോര്‍ട്ടുകളില്‍ പരിശോധന നടത്താന്‍ നിര്‍ദേശം നല്‍കിയിട്ടുണ്ട്. മസിനഗുഡിയില്‍ ഒരു ദിവസത്തെ പരിശോധനയില്‍ 55 റിസോര്‍ട്ടുകളാണ് അനധികൃതമായി പ്രവര്‍ത്തിക്കുന്നതായി കണ്ടെത്തിയത്.
ആനയെ ടയറില്‍ തീയിട്ട് കൊന്ന റിസോര്‍ട്ടിനും ലൈസന്‍സ് ഉണ്ടായിരുന്നില്ല. ജനുവരി ഇരുപത്തിമൂന്നിനാണ് മനസാക്ഷിയെ നടുക്കിയ ക്രൂരത അരങ്ങേറിയത്. തമിഴ്‌നാട് മസിനഗുഡിയില്‍ പെട്രോള്‍ ഒഴിച്ചുകത്തിച്ച ടയര്‍ ആനയുടെ തലയ്ക്കുനേരേ എറിയുന്നതിന്റെയും ആന പ്രാണവേദനയോടെ ഓടുന്നതിന്റെയും ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചിരുന്നു.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
പിന്നീട് മുതുമല വന്യജീവി സങ്കേതത്തിനു സമീപം അവശനിലയില്‍ കണ്ടെത്തിയ കാട്ടാനയെ വനം വകുപ്പ് വിദഗ്ദ ചികിത്സയ്ക്കായി കൊണ്ടുപോകുന്നതിനിടെ ആന ചെരിഞ്ഞു. പൊളളലേറ്റ് രക്തം വാര്‍ന്നാണ് ആന ചെരിഞ്ഞതെന്നായിരുന്നു പോസ്റ്റ് മോര്‍ട്ടം റിപ്പോര്‍ട്ട്.
