യുവ നടൻ ഷെയ്ൻ നിഗവും നിര്‍മ്മാതാക്കളും തമ്മിലുള്ള പ്രശ്നങ്ങൾ പരിഹരിച്ചു. ഏപ്രില്‍ 15 മുതല്‍ അദ്ദേഹത്തിന് പുതിയ സിനിമകളില്‍ അഭിനയിക്കാം. ചിത്രീകരണം പൂര്‍ത്തിയാക്കാനുള്ള വെയിലിലായിരിക്കും ആദ്യം അഭിനയിക്കുക. അതിന് ശേഷം ഖുര്‍ബാനിയും പൂർത്തിയാക്കും. താര സംഘടനയായ എ.എം.എ.എ-യുടെ പ്രസിഡന്റ് മോഹൻലാലിന്റെ നേതൃത്വത്തിൽ നടന്ന ചർച്ചയുടെ അടിസ്ഥാനത്തിലാണ് ഒത്തു തീർപ്പിലെത്തിയത്
ചിത്രീകരണം മുടങ്ങിയ രണ്ടു സിനിമകളുടെയും നിർമ്മാതാക്കൾക്ക് നഷ്ടപരിഹാരം നൽകാൻ ഷെയ്ൻ സമ്മതമറിയിച്ചിരുന്നു. വെയിൽ, കുർബാനി സിനിമകളുടെ നിർമാതാക്കൾക്ക് 32 ലക്ഷം രൂപ നൽകി പ്രശ്നം പരിഹരിക്കാൻ എ.എം.എ.എ-യുടെ (അസോസിയേഷൻ ഫോർ മലയാളം മൂവി ആർട്ടിസ്റ്റ്സ്) യോഗത്തിൽ നേരത്തെ ധാരണയായതാണ്‌. എന്നാൽ, ഷെയ്ൻ ഒരുകോടി രൂപ നൽകണമെന്നായിരുന്നു നിർമ്മാതാക്കളുടെ ആവശ്യം. പക്ഷേ, താര സംഘടനയുടെ തീരുമാനം എന്തായാലും അംഗീകരിക്കാൻ ഇരു കൂട്ടരും തയ്യാറാവുകയായിരുന്നു.
