ഡല്‍ഹി: പ്രധാനമന്ത്രിയുടെ പ്രതിമാസ റേഡിയോ പരിപാടിയായ മന്‍ കി ബാത്തിനിടെ പാത്രം കൊട്ടി കര്‍ഷകര്‍ പ്രതിഷേധിച്ചു. മോദി പ്രസംഗിക്കുന്ന സമയത്ത് പാത്രങ്ങള്‍ കൊട്ടി ശബ്ദമുണ്ടാക്കി പ്രതിഷേധിക്കാന്‍ കര്‍ഷകര്‍ നേരത്തെ തീരുമാനിച്ചിരുന്നു. 2020 ലെ അവസാനത്തെ മന്‍ കി ബാത്ത് എപ്പിസോഡാണ് ഇന്ന് സംപ്രേക്ഷണം ചെയ്തത്.
അടുത്ത വര്‍ഷം നടത്താനിരിക്കുന്ന പരിപാടികള്‍ കേന്ദ്രീകരിച്ചാണ് മോദി ഇന്നത്തെ മന്‍ കി ബാത്തില്‍ സംസാരിച്ചത്.വിവാദമായ കാര്‍ഷികനിയമങ്ങളില്‍ പ്രതിഷേധിച്ചുകൊണ്ടുളള കര്‍ഷകരുടെ പ്രതിഷേധം 31 ദിവസം പിന്നിട്ടു. കേന്ദ്രസര്‍ക്കാരുമായുളള ആറാം ഘട്ട ചര്‍ച്ച ഡിസംബര്‍ 29 ന് നടത്താമെന്നാണ് കര്‍ഷകസംഘടനകളുടെ നിര്‍ദേശം. നേരത്തെ കേന്ദ്രവുമായി നടന്ന അഞ്ച് ചര്‍ച്ചകളും പരാജയമായിരുന്നു.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
കാര്‍ഷികനിയമങ്ങള്‍ റദ്ദാക്കുക, താങ്ങുവില രേഖാമൂലം ഉറപ്പുവരുത്തുക, വായുമലിനീകരണ ഓര്‍ഡിനന്‍സ്, വൈദ്യുതി ഭേദഗതി ബില്ലില്‍ ആവശ്യമായ മാറ്റങ്ങള്‍ വരുത്തുക തുടങ്ങിയ വിഷയങ്ങള്‍ ആറാംഘട്ട ചര്‍ച്ചയില്‍ ഉള്‍പ്പെടുത്തണമെന്നാണ് കര്‍ഷകരുടെ ആവശ്യം. ഡിസംബര്‍ 29ലെ ചര്‍ച്ചയില്‍ ഈ വിഷയങ്ങള്‍ സംസാരിച്ചില്ലെങ്കില്‍ അടുത്ത ദിവസം തന്നെ സിംഘു അതിര്‍ത്തിയില്‍ നിന്ന് ട്രാക്ടര്‍ മാര്‍ച്ച് നടത്തുമെന്ന് കര്‍ഷകര്‍ മുന്നറിയിപ്പ് നല്‍കിയിട്ടുണ്ട്.
