ബംഗളൂരു: ജനുവരി രണ്ട് വരെ രാത്രി കര്‍ഫ്യൂ ഏര്‍പ്പെടുത്തി കര്‍ണാടക സര്‍ക്കാര്‍. രാത്രി പത്തുമുതല്‍ രാവിലെ ആറുമണിവരെയാവും നിയന്ത്രണങ്ങളുണ്ടാവുക എന്ന് കര്‍ണാടക മുഖ്യമന്ത്രി ബിഎസ് യെദിയൂരപ്പ പറഞ്ഞു. കൊറോണ വൈറസ് വ്യാപനം തടയാനായി കര്‍ശന നടപടികളെടുക്കുന്ന രണ്ടാമത്തെ ഇന്ത്യയിലെ സംസ്ഥാനമാണ് കര്‍ണാക. മുന്‍പ് മഹാരാഷ്ട്രയിലും പുതുവത്സരാഘോഷങ്ങള്‍ കണക്കിലെടുത്ത് നിയന്ത്രണങ്ങള്‍ കൊണ്ടുവന്നിരുന്നു.
യുകെയില്‍ വ്യാപിച്ചുകൊണ്ടിരിക്കുന്ന ജനിതക മാറ്റം വന്ന കൊറോണ വൈറസ് നിയന്ത്രിക്കാനാണ് രാത്രി കര്‍ഫ്യൂ ഏര്‍പ്പെടുത്തിയത്. സംസ്ഥാനത്തേക്ക് വിദേശത്തുനിന്നും എത്തുന്ന യാത്രക്കാരെ കര്‍ശനമായി നിരീക്ഷിക്കുന്നുണ്ട്. പൊതുജനം സര്‍ക്കാരിന്റെ തീരുമാനത്തോട് സഹകരിക്കണമെന്ന് കര്‍ണാടക ആരോഗ്യമന്ത്രി ഡോ.കെ സുധാകര്‍ പറഞ്ഞു. ബ്രിട്ടണിലാണ് ജനിതകമാറ്റം വന്ന കൊറോണ വൈറസ് വ്യാപനം കണ്ടെത്തിയത്. നിലവില്‍ ലോകമെങ്ങും പടര്‍ന്നുകൊണ്ടിരിക്കുന്ന കൊറോണ വൈറസിനേക്കാള്‍ വേഗതയില്‍ പടരാന്‍ കഴിവുളള വൈറസാണ് ബ്രിട്ടണില്‍ വ്യാപിക്കുന്നത്.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
വൈറസിന്റെ ഇന്ത്യയിലെ വ്യാപനം തടയാനായി ഡിസംബര്‍ 30 വരെ യുകെയില്‍ നിന്ന് ഇന്ത്യയിലേക്കും തിരിച്ചുമുളള വിമാനങ്ങള്‍ റദ്ദാക്കിയിട്ടുണ്ട്. കഴിഞ്ഞ ദിവസങ്ങളില്‍ യുകെയില്‍ നിന്ന് വന്നവര്‍ നിര്‍ബന്ധമായും പരിശോധനകള്‍ക്ക് വിധേയരാകണമെന്ന് സര്‍ക്കാര്‍ നിര്‍ദേശമുണ്ട്.
