കറാച്ചി: പ്രക്ഷോഭ സമരങ്ങള്‍ക്ക് നേതൃത്വം നല്‍കിയതിന്റെ പേരില്‍ അറസ്റ്റ് ചെയ്യപ്പട്ട് ജയിലിലടയ്ക്കപ്പെട്ട ഇടത് രാഷ്ട്രീയ നേതാക്കളെ നീണ്ട കാലയളവിനു ശേഷം പാക് കോടതി മോചിപ്പിച്ചു. ബാബ ശുക്കൂറുള്ള ബെയ്ഗ്, ബാബ ജാന്‍, അമീര്‍ ഖാന്‍, ഇഫ്തിക്കര്‍ കട്ലാ എന്നിവരാണ് നീണ്ടകാല തടവ് ശിക്ഷയ്ക്ക് ശേഷം ജയില്‍ മോചിതരായത്.
ഇതില്‍ ബാബാ ജാന്‍ നീണ്ട 9 വര്‍ഷമാണ്‌ ജയിലില്‍ കഴിഞ്ഞത്. പ്രമുഖ പരിസ്ഥിതി പ്രവര്‍ത്തകന്‍ കൂടിയായ ബാബ ജാന്‍ ഇടതുപക്ഷ പാര്ട്ടിയായ അവാമി വര്‍ക്കേര്‍സ് പാര്‍ട്ടിയുടെ നേതാവാണ്‌. പാക് അധീന കാശ്മീരില്‍ നിന്ന് ജനകീയ പ്രക്ഷോഭങ്ങളിലൂടെയും പരിസ്ഥിതി പ്രവര്‍ത്തങ്ങളിലൂടെയും ഉയര്‍ന്നുവന്ന നേതാവാണ്‌ ഇദ്ദേഹം. 9 വര്ഷം മുന്പ് നടന്ന ജനകീയ സമരത്തെ തുടര്‍ന്ന് അറസ്റ്റിലായ ബാബ ജാനേ രാജ്യ വിരുദ്ധ നിയമം ചുമത്തിയാണ് ജയിലിലിട്ടത്. പലതവണ ജാമ്യ ഹര്‍ജി കോടതി തള്ളിയിരുന്നു.
വര്‍ഷങ്ങള്‍ക്കുശേഷം യാദൃശ്ചികമായെന്നോണം പുന:പരിശോധനാ ഹര്‍ജി പരിഗണിച്ച കോടതി ബാബ ജാനുള്‍പ്പെടെയുള്ള നേതാക്കളെ മോചിപ്പിക്കാന്‍ ഉത്തരവിടുകയായിരുന്നു. പാക്കിസ്ഥാനിലെ ഇമ്രാന്‍ ഖാന്‍ ഭരണകൂടം രാജ്യത്തെ രാഷ്ട്രീയ തടവുകാരോട് സ്വീകരിക്കുന്ന വളരെ പോസിറ്റീവായ സമീപനം വിധിയെ സ്വാധ്വീനിച്ചിട്ടുണ്ട് എന്നാണ് പാക്ക് രാഷ്ട്രീയം നിരീക്ഷിക്കുന്നവര്‍ അഭിപ്രായപ്പെടുന്നത്.
