ഒട്ടാവ: അടുത്ത മൂന്നു വര്ഷത്തിനുള്ളില് പരമാവധി കുടിയേറ്റക്കാര്ക്ക് അവസരം നല്കാന് കനേഡിയന് സര്ക്കാര് തീരുമാനിച്ചു. അടുത്ത മൂന്നു വര്ഷത്തിനുള്ളില് ചരിത്രത്തിലെ ഏറ്റവും വലിയ കുടിയേറ്റം നടത്താനാണ് സര്ക്കാര് ആലോചിക്കുന്നത് എന്ന് വാര്ത്താ എജന്സികള് റിപ്പോര്ട്ട് ചെയ്യുന്നു. കുടിയേറ്റകാര്യ മന്ത്രി മാര്ക്കോ മെന്സിഡിനോ പാര്ലമെന്റിലാണ് ഇക്കാര്യം പ്രഖ്യാപിച്ചത്.
കൊവിഡ് വ്യാപനം മൂലം ആഭ്യന്തര അന്താരാഷ്ട്ര വിപണികളിലും ആഭ്യന്തര ഉത്പാദനത്തിലും കാനഡ നേരിടുന്ന പ്രതിസന്ധി മറികടക്കാനാണ് കൂടുതല് മനുഷ്യവിഭവ ശേഷി ആര്ജ്ജിക്കാന് രാജ്യം ഒരുങ്ങുന്നത്. അടുത്ത സാമ്പത്തീക വര്ഷത്തേക്കുള്ള പദ്ധതി പ്രഖ്യാപന വേളയിലാണ് പാര്ലമെന്റില് സര്ക്കാര് നയം വ്യക്തമാക്കിയത്. വരുന്ന മൂന്നു വര്ഷത്തിനുള്ളില് ഏകദേശം 15 ലക്ഷത്തോളം പേര്ക്ക് കാനഡയിലേക്ക് കുടിയേറാനാകും. അതേസമയം സര്ക്കാരിന്റെ പ്രഖ്യാപനത്തില് അനുകൂലമായും പ്രതികൂലമായും പ്രതികരണങ്ങള് വന്നിട്ടുണ്ട്. പ്രസ്ഥാനങ്ങളും സാമൂഹ്യ - സാമ്പത്തീക ശാസ്ത്രകാരരും പ്രതികരിച്ചു തുടങ്ങിയിട്ടുണ്ട്.
കൊവിഡ് വ്യാപനം ഉണ്ടാക്കിയ ഉത്പാദന മേഖലയിലെ പ്രതിസന്ധികള് മറികടക്കാന് കൂടുതല് മനുഷ്യ ശേഷി കൈവരിക്കുക എന്നതാണ് സര്ക്കാര് നയമായി വിലയിരുത്തപ്പെടുന്നത്.