ഒളിമ്പിക് സ്വർണ്ണമെഡൽ ജേതാവ് ഉസൈൻ ബോൾട്ടിന് കൊവിഡ്-19 സ്ഥിരീകരിച്ചു. ജമൈക്കയിലെ തന്റെ വീട്ടിൽ ഐസൊലേഷനിൽ ആണെന്ന് ബോള്ട്ട് പറഞ്ഞു. ലോക റെക്കോർഡുകൾ സ്വന്തമാക്കിയ താരം കൊവിഡ് പോസിറ്റീവാണെന്ന് ജമൈക്ക ആരോഗ്യ മന്ത്രാലയമാണ് അറിയിച്ചത്.
കൊവിഡ് പരിശോധനയ്ക്ക് ശേഷം വിശ്രമിക്കുന്ന ഒരു വീഡിയോ ഉസൈൻ ബോൾട്ട് സോഷ്യൽ മീഡിയയിൽ പോസ്റ്റ് ചെയ്തിരുന്നു. സ്റ്റേ സേഫ് മൈ പീപ്പിൾ എന്ന കുറിപ്പോടെയുള്ള വിഡിയോയിൽ അദ്ദേഹത്തിന് കൊവിഡ് ലക്ഷണങ്ങളൊന്നുമില്ലെന്നും എന്നാൽ ഉത്തരവാദിത്തബോധമുള്ള പൗരൻ എന്ന നിലയിൽ സ്വയം ഐസൊലേഷനിൽ പോകുകയാണെന്നും ബോൾട്ട് പറഞ്ഞു. ഇതിന് തൊട്ടുപുറകേയാണ് ഇദ്ദേഹത്തിന് കൊവിഡ് സ്ഥിരീകരിച്ചതായി ആരോഗ്യ മന്ത്രാലയം അറിയിച്ചത്. കഴിഞ്ഞ ആഴ്ച നടന്ന തന്റെ 34-ാം ജന്മദിനാഘോഷത്തിനു ശേഷം ശനിയാഴ്ചയാണ് ബോൾട്ട് കൊവിഡ് ടെസ്റ്റ് നടത്തിയത്. പ്രീമിയർ ലീഗ് താരം റഹീം സ്റ്റെർലിംഗും മുൻ വെസ്റ്റ് ഇൻഡീസ് ക്രിക്കറ്റ് താരം ക്രിസ് ഗെയ്ലും ആഘോഷത്തിൽ പങ്കുചേർന്നിരുന്നു.
സമൂഹമാധ്യമങ്ങള് നിറയെ താരത്തിനായുള്ള ആരാധകരുടെ ആശംസകളാണ്. എന്നാൽ അതിനോടൊപ്പം തന്നെ അശ്രദ്ധയാണ് രോഗം വരാൻ കാരണം എന്ന കുറ്റപ്പെടുത്തലും സമൂഹമാധ്യമങ്ങളിൽ നിറഞ്ഞുനിൽക്കുന്നുണ്ട്