ദേശീയ പൗരത്വ രജിസ്റ്റര്‍ കേരളത്തിൽ നടപ്പാക്കില്ലെന്ന നിലപാട് ആവര്‍ത്തിച്ച് മുഖ്യമന്ത്രി പിണറായി വിജയൻ. ഒരു മതവിഭാഗത്തിന്‍റെ പ്രശ്നമെന്ന നിലയിൽ സംസ്ഥാന സര്‍ക്കാര്‍ പൗരത്വ നിയമ ഭേദഗതിയെ കണ്ടിട്ടില്ല. ദേശീയ പൗരത്വ രജിസ്റ്റര്‍ നടപ്പാക്കില്ലെന്ന് കേന്ദ്രം വിളിച്ച യോഗത്തിലും സംസ്ഥാന സര്‍ക്കാര്‍ നിലപാട് വ്യക്തമാക്കിയിട്ടുണ്ടെന്ന് പിണറായി വിജയൻ നിയമസഭയിൽ പറഞ്ഞു.
നിയമസഭയിൽ എൻ.പി.ആർ, സെൻസസ് നടപടികൾക്കെതിരെ കെ .എം ഷാജിയുടെ അടിയന്തര പ്രമേയ നോട്ടീസിന് മറുപടി പറയുകയായിരുന്നു മുഖ്യമന്ത്രി. സെൻസസ് നടക്കുന്നതിൽ അപാകതയില്ലെന്നും ഇത് സാധാരണ നടപടിയാണെന്നും അദ്ദേഹം പറഞ്ഞു. എൻപിആറുമായി ബന്ധപ്പെട്ട വിവാദ ചോദ്യങ്ങളൊന്നും സെൻസസിൽ ഉണ്ടാകില്ലെന്നും മുഖ്യമന്ത്രി ഉറപ്പ് നൽകി. അനാവശ്യ ഭയം ഉണ്ടാക്കരുതെന്നും മുഖ്യമന്ത്രി നിയമസഭയിൽ പറഞ്ഞു. ഒരു വിഭാഗത്തെ ചിറകിനടിയിലാക്കാൻ തീവ്രനിലപാടുളളവർ ശ്രമിച്ചു. അവർ ഇടപെടും മുമ്പ് സർക്കാർ ഇടപെട്ടു. ഒരുമിച്ചുള്ള പ്രക്ഷേഭത്തിൽ നിന്നും ഇവരെ മാറ്റിനിർത്തിയത് ചിലർക്ക് ഇഷ്ടപ്പെട്ടില്ലെന്നും മുഖ്യന്ത്രി പറഞ്ഞു.
