തിരുവനന്തപുരം: ദിവസങ്ങള്‍ കഴിയുന്തോറും കേന്ദ്ര സാമ്പത്തിക പാക്കേജ് പ്രഖ്യാപനങ്ങള്‍ പ്രഹസനമായി മാറുകയാണെന്ന് സംസ്ഥാന ധനകാര്യ മന്ത്രി ഡോ.തോമസ്‌ ഐസക് പറഞ്ഞു. നാലാം ഘട്ടത്തില്‍ കേന്ദ്ര ധനമന്ത്രി പറയുന്നത് എല്ലാ മേഖലയും സ്വകാര്യ വല്ക്കരിക്കുമെന്നാണ്. ജനങ്ങളുടെ കയ്യില്‍ പണമെത്തിക്കാനുള്ള യാതൊന്നും ധനമന്ത്രി ഇപ്പോഴും പറയുന്നില്ല. കോവിഡിന്‍റെ മറവില്‍ രാജ്യത്തിന്റെ പൊതുസ്വത്ത് വിറ്റുമുടിക്കാനുള്ള നീക്കമാണ് നടക്കുന്നത് -ഡോ.തോമസ്‌ ഐസക് പറഞ്ഞു.
കേന്ദ്ര ധനകാര്യമന്ത്രി യാതൊരു തരത്തിലും ഉപകാരമില്ലാത്ത ചിന്തകളാണ് അവതരിപ്പിക്കുന്നത്. സംസ്ഥാനങ്ങളെ ഈ പ്രതിസന്ധിയില്‍ എങ്ങനെ സഹായിക്കുമെന്ന കാര്യം സാമ്പത്തിക പാക്കേജിന്‍റെ ഭാഗമായി ഇതുവരെ പറഞ്ഞിട്ടില്ലെന്നും ജനങളുടെ ചിലവില്‍ പ്രതിസന്ധി മറികടക്കാനുള്ള നീക്കമാണ് കേന്ദ്രം നടത്തുന്നതെന്നും സംസ്ഥാന ധനകാര്യ മന്ത്രി ആരോപിച്ചു.
