കൊച്ചി: മലയാളത്തിലെ ഇതുവരെയുള്ള എല്ലാ കളക്ഷൻ റെക്കോർഡുകളും പിന്നിലാക്കി ജൂഡ് ആന്റണി ചിത്രം 2018. ടൊവിനോ തോമസ്, ആസിഫലി, കുഞ്ചാക്കോ ബോബൻ എന്നിവർ പ്രധാന റോളിലെത്തിയ ചിത്രം 22 ദിവസം കൊണ്ട് ആഗോള കളക്ഷനിൽ 150 കോടി പിന്നിട്ടു. റിലീസ് ചെയ്ത് 3 ആഴ്ച്ചക്കുള്ളിലാണ് ഈ നേട്ടം സിനിമ ഈ നേട്ടം കൈവരിച്ചത്. നിർമാതാവായ വേണു കുന്നപ്പിള്ളിയാണ് ഇക്കാര്യം സമൂഹ മാധ്യമങ്ങളിലൂടെ ആരാധകരുമായി പങ്കുവെച്ചത്. കേരളത്തെ നടുക്കിയ പ്രളയം ഇതിവൃത്തമാക്കിയാണ് ജൂഡ് ആന്റണി സിനിമ സംവിധാനം ചെയ്തിരിക്കുന്നത്.
അഖില്‍ പി ധര്‍മജന്‍ തിരക്കഥ ഒരുക്കിയ 2018 -ന്റെ ഛായാഗ്രഹണം നിര്‍വഹിച്ചത് അഖില്‍ ജോര്‍ജാണ്. ചമന്‍ ചാക്കോ ചിത്രസംയോജനം. നോബിന്‍ പോളിന്റേതാണ് സംഗീതം. മോഹൻലാലിനെ നായകനാക്കി വൈശാഖ് സംവിധാനം ചെയ്ത പുലിമുരുകൻ എന്ന സിനിമ തീർത്ത 7 വർഷം മുമ്പത്തെ റെക്കോർഡാണ് 2018 തകർത്തത്. ഗ്ലോബൽ കളക്ഷനിൽ പുലിമുരുകൻ പ്രദർശനം അവസാനിപ്പിക്കുമ്പോൾ 146 കോടി നേടിയെന്നാണ് അവകാശ വാദം.
