തിരുവനന്തപുരം: അധ്യാപകര്‍ വിദ്യാര്‍ത്ഥികളെ 'പോടാ പോടീ' എന്ന് വിളിക്കുന്നത് വിലക്കാനൊരുങ്ങി സര്‍ക്കാര്‍. തിരുവനന്തപുരം ജില്ലയിലെ സ്‌കൂളുകളില്‍ ഇത്തരം പ്രയോഗങ്ങള്‍ ഉപയോഗിക്കുന്നത് വിലക്കി വിദ്യാഭ്യാസ ഡെപ്യൂട്ടി ഡയറക്ടര്‍ ഉത്തരവിറക്കി. മറ്റ് ജില്ലകളിലും ഉടന്‍ ഉത്തരവ് പുറത്തിറക്കുമെന്നാണ് റിപ്പോര്‍ട്ട്. വിദ്യാര്‍ത്ഥികളുടെ വ്യക്തിത്വത്തെ ഹനിക്കുന്ന വാക്കുകള്‍ അധ്യാപകര്‍ ഉപയോഗിക്കരുതെന്നും കുട്ടികള്‍ക്ക് മാതൃകയാവുന്ന തരത്തിലുളള വാക്കുകളും പെരുമാറ്റവും മാത്രമേ ഉണ്ടാവാന്‍ പാടുളളുവെന്നും വിദ്യാഭ്യാസ വകുപ്പിന്റെ നിര്‍ദേശത്തില്‍ പറയുന്നു.
തിരുവനന്തപുരം വെട്ടുകാട് സ്വദേശിയായ സുധീഷ് അലോഷ്യസ് റൊസാരിയോ എന്നയാള്‍ മുഖ്യമന്ത്രിക്ക് നല്‍കിയ പരാതിയെത്തുടര്‍ന്നാണ് വിദ്യാഭ്യാസവകുപ്പിന്റെ നടപടി. മറ്റുളളവരോട് നല്ലരീതിയില്‍ ഇടപെടാന്‍ കുട്ടികളെ പ്രാപ്തരാക്കുന്നത് സ്‌കൂളുകളാണ്. അവിടെ അധ്യാപകര്‍ ഇത്തരം പ്രയോഗങ്ങള്‍ നടത്തുന്നത് കുട്ടികള്‍ക്ക് മാനസിക ബുദ്ധിമുട്ടുണ്ടാക്കും എന്നാണ് സുധീഷ് മുഖ്യമന്ത്രിക്ക് അയച്ച കത്തില്‍ പറഞ്ഞത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
നേരത്തെ വിദ്യാര്‍ത്ഥികളുടെ അന്തസിനും അഭിമാനത്തിനും ക്ഷതമുണ്ടാക്കുന്ന തരത്തിലുളള ദേഹപരിശോധനയും ബാഗ് പരിശോധനയും നിരോധിക്കണമെന്ന് ബാലാവകാശ കമ്മീഷന് ഉത്തരവിട്ടിരുന്നു. കുട്ടികള്‍ മൊബൈല്‍ ഉപയോഗിച്ചാല്‍ ആകാശം ഇടിഞ്ഞുവീഴില്ലെന്നും വിദ്യാര്‍ത്ഥികള്‍ക്ക് സ്‌കൂളില്‍ മൊബൈല്‍ കൊണ്ടുവരേണ്ട സാഹചര്യമുണ്ടായാല്‍ അത് ഓഫാക്കി സൂക്ഷിക്കാന്‍ അധ്യാപകര്‍ സൗകര്യമൊരുക്കണമെന്നും കമ്മീഷന് പറഞ്ഞിരുന്നു.
