ഡല്‍ഹി: ക്രിക്കറ്റ് താരങ്ങളായ വിരാട് കോഹ്ലിയാണോ രോഹിത് ശർമയാണോ മികച്ച താരമെന്ന ചോദ്യം കുറച്ച് നാളുകളായി ഉയര്‍ന്നുവരുന്നതാണ്. എന്നാല്‍ ഇതിനുവ്യക്തമായ ഉത്തരം നല്‍കാന്‍ ഇതുവരെ ആര്‍ക്കും സാധിച്ചിരുന്നില്ല. എന്നാല്‍ ഈ വിഷയത്തില്‍ ഇപ്പോള്‍ തന്‍റെ നിലപാട് വ്യക്തമാക്കിയിരിക്കുകയാണ് മുന്‍ പാക് ക്രിക്കറ്റര്‍ സുഹൈല്‍ ഖാന്‍. വിരാട് കോഹ്ലിയെക്കാള്‍ മികച്ച താരം രോഹിത് ശര്‍മയാണെന്ന് സുഹൈല്‍ ഖാന്‍ പറഞ്ഞു. കോഹ്ലി മികച്ച കളിക്കാരനാണെന്ന കാര്യത്തില്‍ തര്‍ക്കമില്ല. അദ്ദേഹത്തോട് തനിക്ക് എപ്പോഴും ബഹുമാനമാണ്. എന്നാല്‍ തന്‍റെ കരിയറില്‍ നേരിട്ട മികച്ച ബാറ്റ്സ്മാന്‍ രോഹിത് ശര്‍മയാണെന്ന് സുഹൈല്‍ ഖാന്‍ കൂട്ടിച്ചേര്‍ത്തു.
'സാങ്കേതികമായി മികച്ച കളിയാണ് രോഹിത് ശര്‍മ പുറത്തെടുക്കുന്നത്. ഏറെ സമയമെടുത്താണ് രോഹിത് ബാറ്റുവീശുന്നത്. ഞാന്‍ ഇത് വളരെ ശ്രദ്ധിച്ചിട്ടുണ്ട്. അടുത്തിടയായി രോഹിതിന് മികച്ച പ്രകടനം കാഴ്ചവെക്കാന്‍ സാധിക്കുന്നില്ലെന്ന് സത്യമാണ്. എന്നാല്‍ കഴിഞ്ഞ ഒരു പതിറ്റാണ്ടിലേറെ കാലമായി ലോകക്രിക്കറ്റിനെ അടക്കിവാണിരുന്ന താരമാണ് രോഹിത് എന്നും സുഹൈല്‍' ഖാന്‍ പറഞ്ഞു.
യൂട്യൂബ് ചാനലിലെ 'നാദിർ അലി പോഡ്‌കാസ്റ്റ്' ഷോയിൽ സംസാരിക്കവേയാണ് സുഹൈല്‍ ഇക്കാര്യം വ്യക്തമാക്കിയത്. അതേസമയം, ബോര്‍ഡര്‍ ഗവാസ്കര്‍ പരമ്പരയില്‍ ഓസ്ട്രേലിയയെ നേരിടാന്‍ ഒരുങ്ങുകയാണ് ഇന്ത്യ. അടുത്ത വ്യാഴാഴ്ചയാണ് നാല് മത്സരങ്ങളടങ്ങിയിട്ടുള്ള ടെസ്റ്റ്‌ പരമ്പര ആരംഭിക്കുന്നത്.
