ഡല്‍ഹി: കേരളത്തിലെ കുട്ടികള്‍ക്ക് ഫുട്‌ബോള്‍ പരിശീലനം നല്‍കാന്‍ തയാറാണെന്ന് അര്‍ജന്റീന. ഇന്ത്യ മുഴുവന്‍ അര്‍ജന്റീനയുടെയും മെസിയുടെയും ആരാധകരുണ്ടെങ്കിലും ഹൃദയംകവരുന്ന ആരാധകരുളളത് കേരളത്തിലാണെന്നും കുട്ടികള്‍ക്ക് പരിശീലനം നല്‍കാനുളള നടപടികളുമായി മുന്നോട്ടുപോകുമെന്നും അര്‍ജന്റീന എംബസി കൊമേഴ്ഷ്യല്‍ ഹെഡ് ഫ്രാങ്കോ അഗസ്റ്റിന്‍ സെനില്ല്യനി മെല്‍ഷ്യര്‍ പറഞ്ഞു. അര്‍ജന്റീനയെ നെഞ്ചിലേറ്റുന്ന മലയാളി ആരാധകര്‍ക്ക് നന്ദി അറിയിച്ച് ഡല്‍ഹി മലയാളി ഹൗസിലെത്തിയപ്പോഴാണ് ഫ്രാങ്കോ അഗസ്റ്റിന്‍ ഇക്കാര്യം അറിയിച്ചത്.
'വൈകാതെ തന്നെ ഇന്ത്യയിലെ അര്‍ജന്റീന അംബാസഡര്‍ ഹ്യൂഗോ ജാവിയര്‍ ഗോബിയും സംഘവും കേരളം സന്ദര്‍ശിക്കും. കേരളവുമായുളള സഹകരണ സാധ്യതകള്‍ പരിശോധിക്കും. ഫുട്‌ബോളിനുപുറമേ കൃഷി, മത്സ്യബന്ധനം എന്നിവയിലെ സാധ്യതകളും പരിശോധിക്കും'- ഫ്രാങ്കോ അഗസ്റ്റിന്‍ സെനില്ല്യനി മെല്‍ഷ്യര്‍ പറഞ്ഞു. കേരളത്തിന്റെ വിവിധ ഭാഗങ്ങളില്‍നിന്നുളള അര്‍ജന്റീന ആരാധകരുടെ ആഹ്ലാദപ്രകടനങ്ങളും ലോകകപ്പ് ഫൈനലിന്റെ പ്രസക്ത ഭാഗങ്ങളും ചേര്‍ത്ത് തയാറാക്കിയ വീഡിയോയും അദ്ദേഹം കണ്ടു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യു
കേരളത്തിലെ ഫുട്‌ബോള്‍ ആരാധകരെക്കുറിച്ച് ലോകകപ്പ് സമയത്ത് ലോകമാകെ ചര്‍ച്ച ചെയ്തിരുന്നു. കേരളത്തില്‍ അര്‍ജന്റീന ആരാധകര്‍തന്നെയായിരുന്നു കൂടുതല്‍. കൂറ്റന്‍ കട്ടൗട്ടുകളും ബാനറുകളും തോരണങ്ങളും തൂക്കി അവര്‍ അര്‍ജന്റീന ടീമിനെ പിന്തുണച്ചു. മത്സരത്തിലെ വിജയത്തിനുശേഷം അര്‍ജന്റീന കേരളത്തിന്റെ പിന്തുണയ്ക്ക് നന്ദി അറിയിക്കുകയും ചെയ്തിരുന്നു. ട്വിറ്ററിലൂടെയാണ് ഇന്ത്യയ്ക്കും മറ്റ് രാജ്യങ്ങള്‍ക്കും നന്ദി അറിയിക്കുന്നതിനോടൊപ്പം കേരളത്തിനും അര്‍ജന്റീന ഫുട്‌ബോള്‍ അസോസിയേഷന്‍ നന്ദി പറഞ്ഞത്.
