തിരുവന്തപുരം: മന്ത്രി വി അബ്ദുറഹിമാനെതിരെ വര്‍ഗീയ പരാമര്‍ശം നടത്തിയ വിഴിഞ്ഞം സമരസമിതി കണ്‍വീനര്‍ ഫാ. തിയോഡോഷ്യസ് ഡിക്രൂസിനെതിരെ പൊലീസ് കേസെടുത്തു. ജാമ്യമില്ലാ വകുപ്പ് ചുമത്തി വിഴിഞ്ഞം പൊലീസാണ് കേസെടുത്തത്. സാമുദായിക സംഘര്‍ഷം വളര്‍ത്താനുളള ശ്രമം, മതവിദ്വേഷം വളര്‍ത്തല്‍ എന്നീ വകുപ്പുകളാണ് ഫാ. തിയോഡോഷ്യസിനെതിരെ ചുമത്തിയിരിക്കുന്നത്. 'അബ്ദുറഹിമാന്‍ എന്ന പേരില്‍തന്നെ തീവ്രവാദിയുണ്ട്' എന്നായിരുന്നു ഫാ. തിയോഡോഷ്യസിന്റെ പരാമര്‍ശം.
വിഴിഞ്ഞം തുറമുഖ നിര്‍മ്മാണ പദ്ധതിയില്‍നിന്ന് സര്‍ക്കാര്‍ ഒരിഞ്ചുപോലും പിന്നോട്ടില്ലെന്ന് മന്ത്രി വി അബ്ദുറഹിമാന്‍ കഴിഞ്ഞ ദിവസം വിഴിഞ്ഞം തുറമുഖ സെമിനാറില്‍ പങ്കെടുത്ത് സംസാരിക്കവേ പറഞ്ഞിരുന്നു. അതിനുപിന്നാലെയായിരുന്നു മന്ത്രിയുടെ പേരില്‍തന്നെ തീവ്രവാദമുണ്ടെന്ന സമരസമിതി കണ്‍വീനറുടെ പരാമര്‍ശം. പരാമര്‍ശം വിവാദമായതോടെ ലത്തീന്‍ രൂപതയും ഫാ. തിയോഡോഷ്യസും മാപ്പുപറഞ്ഞ് പ്രസ്താവനയിറക്കിയിരുന്നു. മന്ത്രിക്കെതിരായ പരാമര്‍ശം വികാരവിക്ഷോഭത്തിലുണ്ടായതാണെന്നും നാക്കുപിഴയാണെന്നും തിയോഡോഷ്യസ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അതേസമയം, വികസനത്തിന്റെ പേരില്‍ തീരദേശവാസികളെ കൈവിടരുതെന്ന് സിറോ മലബാര്‍ സഭ അല്‍മായ ഫോറം പുറത്തിറക്കിയ പ്രസ്താവനയില്‍ പറഞ്ഞു. പദ്ധതി നടപ്പിലാക്കണമെന്ന് സര്‍ക്കാര്‍ വാശിപിടിക്കുന്നത് ന്യായീകരിക്കാവാനില്ലെന്നും മത്സ്യത്തൊഴിലാളികളുടെ ജീവന്‍മരണ പോരാട്ടത്തെ അസഹിഷ്ണുതയോടെ നേരിടുന്നതിനെ അംഗീകരിക്കാനാവില്ലെന്നും സിറോ മലബാര്‍ സഭയുടെ പ്രസ്താവനയില്‍ പറയുന്നുണ്ട്.
