അഹമ്മദാബാദ്: ഗുജറാത്തില് പ്രചാരണത്തിന് വിദേശികളെ ഇറക്കിയ ബിജെപിക്കെതിരെ തെരഞ്ഞെടുപ്പ് കമ്മീഷന് പരാതി നല്കി തൃണമൂല് കോണ്ഗ്രസ്. ടിഎംസി ദേശീയ വക്താവ് സാകേത് ഗോഖലെയാണ് പ്രചാരണത്തിനിറങ്ങിയ വിദേശികള്ക്കെതിരെ നടപടിയെടുക്കണമെന്നാവശ്യപ്പെട്ട് തെരഞ്ഞെടുപ്പ് കമ്മീഷന് കത്തയച്ചത്. ബിജെപി ഗുരുതരമായ തെരഞ്ഞെടുപ്പ് നിയമലംഘനമാണ് നടത്തിയതെന്നും വിദേശികളെ പ്രചാരണത്തിനിറക്കിയത് ഇന്ത്യന് വിസാ നിയമത്തിന്റെ ലംഘനമാണെന്നും സാകേത് ഗോഖലെ പറയുന്നു. വിദേശികള് ബിജെപിക്കായി പ്രചാരണം നടത്തുന്നതിന്റെ വീഡിയോ ഗുജറാത്ത് ബിജെപിയുടെ ട്വിറ്റര് അക്കൗണ്ട് വഴിയാണ് പുറത്തുവിട്ടത്. 'നിങ്ങള്ക്ക് മഹാനായ ഒരു നേതാവുണ്ട്. അദ്ദേഹത്തില് വിശ്വസിക്കുക' എന്ന വിദേശികളുടെ വാക്ക് അടിക്കുറിപ്പായി നല്കിയാണ് ബിജെപി വീഡിയോ പങ്കുവെച്ചത്.
'ഭാരതീയ ജനതാ പാര്ട്ടി ഗുജറാത്ത് അവരുടെ ട്വിറ്റര് അക്കൗണ്ട് വഴി പുറത്തുവിട്ട ഒരു വീഡിയോയില് കുറച്ച് വിദേശ പൗരന്മാര് കാവി ഷാള് ധരിച്ച് ബിജെപിക്കുവേണ്ടി പ്രചാരണം നടത്തുന്നതും ഗുജറാത്തിലെ ജനങ്ങള് എങ്ങനെ വോട്ടുചെയ്യണമെന്ന് സംസാരിക്കുന്നതും കാണാം. ഇത് തെരഞ്ഞെടുപ്പ് നിയമലംഘനമാണ്. 1951-ലെ ജനപ്രാധിനിധ്യ നിയമത്തിന്റെയും ഇന്ത്യന് വിസാ നിയമങ്ങളുടെയും ലംഘനമാണ്. വിഷയത്തിന്റെ ഗൗരവം കണക്കിലെടുത്ത് പരാതിയില് ഉടനടി നടപടിയെടുക്കാന് തെരഞ്ഞെടുപ്പ് കമ്മീഷനോട് അഭ്യര്ത്ഥിക്കുന്നു'-സാകേത് ഗോഖലെ തെരഞ്ഞെടുപ്പ് കമ്മീഷന് അയച്ച കത്തില് പറഞ്ഞു. പ്രചാരണത്തിനിറങ്ങിയ വിദേശികള്ക്കെതിരെ ഇമിഗ്രേഷന് നിയമപ്രകാരം നടപടിയെടുക്കാന് ഗുജറാത്ത് ഫോറിനേഴ്സ് റീജിയണല് രജിസ്ട്രേഷന് ഓഫീസറോട് അഭ്യര്ത്ഥിക്കുമെന്നും അദ്ദേഹം കൂട്ടിച്ചേര്ത്തു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക