ഗാന്ധിനഗര്‍: ഗുജറാത്ത് നിയമസഭാ തെരഞ്ഞെടുപ്പില്‍ ആം ആദ്മി പാര്‍ട്ടിയുടെ മുഖ്യമന്ത്രി സ്ഥാനാര്‍ഥി ആരാവണമെന്ന് ജനങ്ങള്‍ക്ക് തീരുമാനിക്കാമെന്ന് പാര്‍ട്ടി കണ്‍വീനറും ഡല്‍ഹി മുഖ്യമന്ത്രിയുമായ അരവിന്ദ് കെജരിവാള്‍ പറഞ്ഞു. ''ഇപ്പോഴത്തെ ഗുജറാത്ത് മുഖ്യമന്ത്രി വിജയ് രൂപാനിയെ കൊണ്ടുവന്നത് ജനങ്ങളുടെ ആഗ്രഹപ്രകാരമല്ല. അത് ഡല്‍ഹിയില്‍ നിന്നുള്ള തീരുമാനമായിരുന്നു. എന്നാല്‍ ആം ആദ്മി പാര്‍ട്ടിയില്‍ ജനങ്ങള്‍ ആഗ്രഹിക്കുന്നവരാണ് മുഖ്യമന്ത്രിയാവുക. തീര്‍ച്ചയായും ഗുജറാത്തില്‍ ആം ആദ്മി പാര്‍ട്ടി സര്‍ക്കാര്‍ രൂപീകരിക്കും''-അരവിന്ദ് കെജരിവാള്‍ പറഞ്ഞു.
ഈ വര്‍ഷം അവസാനത്തോടെ നടക്കുന്ന ഗുജറാത്ത് നിയമസഭാ തെരഞ്ഞെടുപ്പില്‍ വലിയ പ്രതീക്ഷയാണ് ആം ആദ്മി പാര്‍ട്ടി വെച്ചുപുലര്‍ത്തുന്നത്. അരവിന്ദ് കെജരിവാള്‍ തന്നെ നേരിട്ടെത്തിയാണ് തെരഞ്ഞെടുപ്പ് പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്. ജനങ്ങള്‍ക്ക് ലഭിക്കുന്ന സേവനങ്ങളില്‍ വന്‍ അനുകൂല്യങ്ങളാണ് തെരഞ്ഞെടുപ്പ് വാഗദാനമായി എ എ പി നല്‍കുന്നത്.
അധികാരത്തിലെത്തിയാല്‍ ഗുജറാത്തിലെ ഓരോ കുടുംബത്തിനും പ്രതിമാസം 30,000 രൂപയുടെ ആനുകൂല്യങ്ങള്‍ നല്‍കും. ഡല്‍ഹിയിലും പഞ്ചാബിലും ചെയ്തതുപോലെ സംസ്ഥാനത്തെ അഴിമതി അവസാനിപ്പിക്കും. ‘രാജ്യത്ത് ഏറ്റവും കൂടുതല്‍ പണപ്പെരുപ്പമുള്ളത് ഗുജറാത്തിലാണ്. ഞാന്‍ ആദ്യം നിങ്ങളെ വിലക്കയറ്റത്തില്‍ നിന്ന് മോചിപ്പിക്കും. മാര്‍ച്ച് ഒന്നിന് ശേഷം വൈദ്യുതി ബില്ലുകള്‍ അടയ്‌ക്കേണ്ടതില്ല. ഞാന്‍ നിങ്ങള്‍ക്കായി അത് ചെയ്യും. ഞാന്‍ നിങ്ങള്‍ക്ക് പ്രതിമാസം 27,000 രൂപയുടെ ആനുകൂല്യങ്ങള്‍ നല്‍കും.'-പഞ്ച്മഹല്‍ ജില്ലയിലെ മോര്‍വ ഹദാഫില്‍ ഒരു റാലിയെ അഭിസംബോധന ചെയ്യവെ കെജരിവാള്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ആം ആദ്മി പാര്‍ട്ടി അധികാരത്തില്‍ വന്നാല്‍ ഒരു കുടുംബത്തിന് വൈദ്യുതി ബില്ലില്‍ 3,000 രൂപയും വിദ്യാഭ്യാസ ചെലവിനായി 10,000 രൂപയും ലാഭിക്കാം. തൊഴിലില്ലാത്ത യുവാക്കള്‍ക്ക് 3,000 രൂപയും സ്ത്രീകള്‍ക്ക് 1,000 രൂപ ഓണറേറിയവും നല്‍കും. ഇങ്ങനെ ഓരോ വീടിനും പ്രതിമാസം 30,000 രൂപയുടെ സഹായം ലഭിക്കുമെന്നുമാണ് ആം ആദ്മി പാര്‍ട്ടിയുടെ പ്രഖ്യാപനം.
