2020 ലെ ഇന്ത്യൻ പ്രീമിയർ ലീഗ് 'ഇനിയൊരു അറിയിപ്പ് ഉണ്ടാകുന്നതുവരെ' സസ്പെൻഡ് ചെയ്തുവെന്ന് ബിസിസിഐ. ഐപിഎൽ റദ്ദാക്കുകയോ ഉപേക്ഷിക്കുകയോ ചെയ്യുന്ന കാര്യം ഇതുവരെ പരിഗണിച്ചിട്ടില്ലെന്നും രാജ്യാന്തര ക്രിക്കറ്റ് കലണ്ടറിന്റെ അടിസ്ഥാനത്തിൽ ഈ വർഷം ഒടുവിലാണെങ്കിലും ടൂർണമെന്റ് നടത്താൻ കഴിയുമെന്നാണു പ്രതീക്ഷയെന്നും ബിസിസിഐ പറയുന്നു. മാർച്ച്‌ 29 മുതൽ മെയ്‌ 24വരെയായിരുന്നു നടക്കേണ്ടിയിരുന്നത്‌. കൊവിഡ്‌ –19 ആശങ്കയെ തുടർന്ന്‌ ഏപ്രിൽ 15-ലേക്കാണ്‌ മാറ്റിവച്ചത്‌. ലോക്ക്‌ഡൗൺ നീണ്ടതോടെ ബിസിസിഐ ടൂർണമെന്റ് വീണ്ടും മാറ്റിവയ്‌ക്കാൻ നിർബന്ധിതരാവുകയായിരുന്നു.
അനിശ്ചിതമായി നീട്ടിവെച്ചതിനെക്കുറിച്ച് എട്ട് ഫ്രാഞ്ചൈസികളെയും മറ്റ് പങ്കാളികളെയും അറിയിച്ചതായി ബിസിസിഐ വ്യക്തമാക്കി. ടൂർണമെന്റ് നടത്താനായില്ലെങ്കിൽ ബിസിസിഐക്കും കളിക്കാർക്കും ഫ്രാഞ്ചൈസികൾക്കും വന്‍ സാമ്പത്തിക നഷ്ടമുണ്ടാകും. എന്നാല്‍, മനുഷ്യജീവനെക്കാൾ വലുതല്ല ഒരു കളിയുമെന്നായിരുന്നു കഴിഞ്ഞ ദിവസം ബിസിസിഐ പ്രസി‍ഡന്റ് സൗരവ് ഗാംഗുലിയുടെ പ്രതികരണം.
