തിരുവനന്തപുരം: സംസ്ഥാനത്ത് നാളെ പോപ്പുലര് ഫ്രണ്ട് ഹര്ത്താല്. രാവിലെ 6 മണി മുതല് വൈകിട്ട് 6 മണിവരെയാണ് ഹര്ത്താല്. അന്വേഷണ ഏജന്സിയായ എന് ഐ എ ദേശിയ വ്യാപകമായി നടത്തിയ റെയ്ഡിലും അറസ്റ്റിലും പ്രതിഷേധിച്ചാണ് പോപ്പുലര് ഫ്രണ്ട് നാളെ സംസ്ഥാന വ്യാപകമായി ഹര്ത്താല് പ്രഖ്യാപിച്ചത്.
കേരളം ഉള്പ്പെടെ 13 സംസ്ഥാനങ്ങളിലാണ് എന് ഐ എ ഒരേ സമയം റെയ്ഡ് നടത്തിയത്. ദേശിയ നേതാക്കളെയടക്കം106 പോപ്പുലര് ഫ്രണ്ട് നേതാക്കളെയാണ് എന് ഐ എ അറസ്റ്റ് ചെയ്തത്. എന് ഐ എയുടെ നീക്കം സംസ്ഥാന സര്ക്കാരുകള് അറിഞ്ഞിരുന്നില്ലെന്നാണ് ദേശിയ മാധ്യമങ്ങള് റിപ്പോര്ട്ട് ചെയ്യുന്നത്.
അതേസമയം, പരിശോധനയുമായി ബന്ധപ്പെട്ട വിവരങ്ങള് വിലയിരുത്താന് കേന്ദ്ര അഭ്യന്തരമന്ത്രി അമിത് ഷായുടെ നേതൃത്വത്തില് യോഗം ചേര്ന്നുവെന്നും വാര്ത്തകള് പുറത്തുവരുന്നുണ്ട്. അമിത് ഷായും ദേശീയ സുരക്ഷ ഉപദേഷ്ടാവ് അജിത് ഡോവലും പങ്കെടുത്ത യോഗത്തിലാണ് സ്ഥിതികള് വിലയിരുത്തിയത്. ഇന്ന് വെളുപ്പിനാണ് എന് ഐ എ പോപ്പുലര് ഫ്രണ്ട് നേതാക്കളുടെ വീടുകളിലും ഓഫീസുകളിലുമടക്കം പരിശോധന നടത്തിയത്.