കോഴിക്കോട്: ലൈംഗികാതിക്രമ പരാതിയില് എഴുത്തുകാരനും സാംസ്കാരിക പ്രവര്ത്തകനുമായ സിവിക് ചന്ദ്രന് മുന്കൂര് ജാമ്യം. കൊയിലാണ്ടി പൊലീസ് രജിസ്റ്റര് ചെയ്ത രണ്ടാമത്തെ ലൈംഗികാതിക്രമ പരാതിയിലാണ് ഇപ്പോള് ജാമ്യം ലഭിച്ചിരിക്കുന്നത്. കോഴിക്കോട് ജില്ലാ കോടതിയാണ് ജാമ്യം അനുവദിച്ചത്. ആക്ടിവിസ്റ്റും യുവ എഴുത്തുകാരിയുമായ യുവതിയാണ് സിവിക് ചന്ദ്രനെതിരെ രണ്ടാമത്തെ പരാതി നല്കിയത്. 2020 ഫെബ്രുവരി 8-ന് കൊയിലാണ്ടി നന്തി കടപ്പുറത്ത് കവിതാ ക്യാമ്പിനിടെ ആളൊഴിഞ്ഞ സ്ഥലത്തുവെച്ച് ലൈംഗികമായി പീഡിപ്പിക്കാന് ശ്രമിച്ചു എന്നാണ് യുവ എഴുത്തുകാരി നല്കിയ പരാതിയില് ആരോപിക്കുന്നത്.
നേരത്തെ, അധ്യാപികയും എഴുത്തുകാരിയുമായ ദളിത് യുവതിയുടെ പീഡനപരാതിയില് സിവിക് ചന്ദ്രന് ജില്ലാ കോടതി മുന്കൂര് ജാമ്യം അനുവദിച്ചിരുന്നു. പ്രായവും ആരോഗ്യപ്രശ്നങ്ങളും പരിഗണിച്ചാണ് കോടതി സിവിക്കിന് ജാമ്യം നല്കിയത്. ഉപാധികളൊന്നുമില്ലാതെയായിരുന്നു അന്ന് മുന്കൂര് ജാമ്യം അനുവദിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
തനിക്കെതിരായ ലൈംഗികാതിക്രമ പരാതി വ്യാജമാണെന്ന് സിവിക് ചന്ദ്രന് മുന്കൂര് ജാമ്യാപേക്ഷയില് പറഞ്ഞിരുന്നു. ഊന്നുവടിയില്ലാതെ നടക്കാന്പോലുമാകാത്തയാളാണ് താനെന്നും പരാതിക്കാരി അംഗമായ സംഘം ആഭ്യന്തര സെല്ലിനെക്കൊണ്ട് ഈ വിഷയം അന്വേഷിപ്പിച്ചതാണെന്നും പട്ടിക ജാതി- പട്ടിക വര്ഗ നിയമപ്രകാരം ചുമത്തിയ കേസ് നിലനില്ക്കില്ലെന്നും സിവിക് ചന്ദ്രന് ജാമ്യാപേക്ഷയില് ചൂണ്ടിക്കാട്ടിയിരുന്നു.