ഡല്ഹി: പ്രധാനമന്ത്രി നരേന്ദ്രമോദി ചോദ്യങ്ങളെ ഭയപ്പെടുകയാണെന്ന് ഇന്ത്യന് നാഷണല് കോണ്ഗ്രസ് നേതാവ് രാഹുല് ഗാന്ധി. രാജ്യത്തെ തൊഴിലില്ലായ്മയെയും വിലക്കയറ്റത്തെയുംകുറിച്ച് ചോദ്യങ്ങളുന്നയിച്ചതിന് 57 എംപിമാരെ അറസ്റ്റ് ചെയ്യുകയും 23 എംപിമാരെ സസ്പെന്ഡ് ചെയ്യുകയും ചെയ്തെന്ന് രാഹുല് ഗാന്ധി പറഞ്ഞു. പ്രധാനമന്ത്രിയെ രാജാവ് എന്നാണ് രാഹുല് ഗാന്ധി അഭിസംബോധന ചെയ്തത്. രാജാവ് ചോദ്യങ്ങളെ ഭയപ്പെടുകയാണെന്നും ഏകാധിപതികളോട് എങ്ങനെ പോരാടണമെന്ന് തങ്ങള്ക്ക് നന്നായി അറിയാമെന്നും രാഹുല് ഗാന്ധി വ്യക്തമാക്കി. രാജ്യം നേരിടുന്ന പ്രധാന പ്രശ്നങ്ങളെക്കുറിച്ച് ചോദ്യങ്ങളുന്നയിക്കാന് പാര്ലമെന്റിന്റെ മണ്സൂണ് സെഷനില് പ്രതിപക്ഷത്തിന് അനുമതി ലഭിക്കുന്നില്ലെന്ന് ആരോപിച്ച രാഹുല് പ്രധാനമന്ത്രിയോടായി പത്ത് ചോദ്യങ്ങളും ചോദിച്ചു.
1: കഴിഞ്ഞ 45 വര്ഷത്തിനിടെ രാജ്യത്തെ തൊഴിലില്ലായ്മ എന്തുകൊണ്ടാണ് ഇത്രയും ഉയര്ന്ന നിലയില് തുടരുന്നത്? 2 കോടി തൊഴിലവസരങ്ങള് സൃഷ്ടിക്കുമെന്ന വാഗ്ദാനത്തിന് എന്ത് സംഭവിച്ചു?
2: ധാന്യങ്ങള്, തൈര് തുടങ്ങിയ അവശ്യവസ്തുക്കള്ക്ക് ജിഎസ്ടി ചുമത്തി ജനങ്ങളുടെ ഭക്ഷണത്തില് മണ്ണിടുന്നത് എന്തിനാണ്?
3: പാചക എണ്ണ, പാചകവാതകം, പെട്രോള്, ഡീസല് എന്നിവയുടെ വില റോക്കറ്റ് പോലെ കുതിക്കുകയാണ്. ഇതില്നിന്ന് ജനങ്ങള്ക്ക് എന്നാണ് ഒരു ആശ്വാസം ലഭിക്കുക?
4: ഡോളറിനെതിരെ രൂപയുടെ മൂല്യം 80 ആയത് എങ്ങനെയാണ്?
5: കഴിഞ്ഞ2 വര്ഷത്തിനിടെ സൈന്യത്തില് ഒരു നിയമനവും നടത്താതെ അഗ്നിപഥ് എന്ന പുതിയ പദ്ധതി കൊണ്ടുവന്നിരിക്കുകയാണ്. എന്തിനാണ് നാലുവര്ഷത്തേക്ക് രാജ്യത്തെ യുവാക്കളെ അഗ്നിവീരന്മാരാകാന് നിര്ബന്ധിതരാക്കുന്നത്?
6: ലഡാക്കിലെയും അരുണാചല് പ്രദേശിലേയും അതിര്ത്തികളില് ചൈനീസ് സൈന്യം പ്രവേശിച്ചുകഴിഞ്ഞു. ഇപ്പോഴും എന്തുകൊണ്ടാണ് ആ വിഷയത്തില് നിശബ്ദത പാലിക്കുന്നത്? ആ വിഷയത്തില് നിങ്ങലെന്താണ് ചെയ്യുന്നത്?
7: വിള പരിരക്ഷ കൊണ്ട് ഇന്ഷുറന്സ് കമ്പനികള്ക്ക് നാല്പ്പതിനായിരം കോടി രൂപ ലാഭമുണ്ടായി. കര്ഷകരുടെ വരുമാനം ഇരട്ടിയാക്കുമെന്ന വാഗ്ദാനം എന്തായി? ഇക്കാര്യത്തില് മൗനം പാലിക്കുന്നത് എന്തുകൊണ്ടാണ്?
8: താങ്ങുവിലയുടെ കാര്യം എന്തായി? കര്ഷക പ്രക്ഷോഭത്തിനിടെ മരിച്ച കര്ഷകരുടെ കുടുംബങ്ങള്ക്ക് നഷ്ടപരിഹാരം നല്കിക്കഴിഞ്ഞോ?
9: മുതിര്ന്ന പൗരന്മാര്ക്ക് ട്രെയിന് ടിക്കറ്റുകളില് നല്കിവന്നിരുന്ന 50 ശതമാനം ഇളവ് നിര്ത്തലാക്കിയത് എന്തിനാണ്?
10: 2014-ല് കേന്ദ്രസര്ക്കാരിന്റെ സാമ്പത്തിക ബാധ്യത 56 ലക്ഷം കോടി രൂപയായിരുന്നു. ഇപ്പോള് അത് 139 ലക്ഷം കോടി രൂപയായി. 2023 മാര്ച്ച് ആകുമ്പോഴേക്കും അത് 156 ലക്ഷം കോടി രൂപയാകും. എന്തിനാണ് രാജ്യത്തെ കടക്കെണിയിലാക്കുന്നത്?
ചോദ്യങ്ങളുടെ പട്ടിക വളരെ വലുതാണ്. എന്നാല് പ്രധാനമന്ത്രി ആദ്യം എന്റെ ഈ പത്ത് ചോദ്യങ്ങള്ക്കുളള മറുപടി നല്കണം. ഭീഷണിപ്പെടുത്തി ഉത്തരവാദിത്വങ്ങളില്നിന്ന് ഒഴിഞ്ഞുമാറാന് കോണ്ഗ്രസ് നരേന്ദ്രമോദിയെ അനുവദിക്കില്ല. ജനങ്ങളുടെ ശബ്ദമാണ് കോണ്ഗ്രസ്. അവരുടെ പ്രശ്നങ്ങള്ക്കായി ഇനിയും ഞങ്ങള് ശബ്ദമുയര്ത്തിക്കൊണ്ടേയിരിക്കും-രാഹുല് ഗാന്ധി ഫേസ്ബുക്കില് കുറിച്ചു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക