കണ്ണൂര്: മുഖ്യമന്ത്രി പിണറായി വിജയനെതിരെ വിമാനത്തില് യൂത്ത് കോണ്ഗ്രസ് പ്രവര്ത്തകര് പ്രതിഷേധിച്ച സംഭവത്തില് നടപടിയുമായി ഇന്ഡിഗോ എയര്ലൈന്. മുഖ്യമന്ത്രിക്കെതിരെ പ്രതിഷേധിച്ച യൂത്ത് കോണ്ഗ്രസുകാരെ തളളിയിട്ട എല്ഡിഎഫ് കണ്വീനര് ഇ പി ജയരാജന് മൂന്നാഴ്ച്ചത്തെ യാത്രാവിലക്കും പ്രതിഷേധിച്ച യൂത്ത് കോണ്ഗ്രസ് പ്രവര്ത്തകര്ക്ക് രണ്ടാഴ്ച്ചത്തെ വിലക്കുമാണ് ഏര്പ്പെടുത്തിയിരിക്കുന്നത്. എന്നാല് ഇന്ഡിഗോയുടെ വിലക്ക് സംബന്ധിച്ച് വിവരം ലഭിച്ചിട്ടില്ലെന്നാണ് ഇപി ജയരാജന്റെ പ്രതികരണം.
കണ്ണൂരില്നിന്നും തിരുവനന്തപുരത്തേക്കുളള വിമാന യാത്രയില് യൂത്ത് കോണ്ഗ്രസ് പ്രവര്ത്തകര് മുഖ്യമന്ത്രിക്കെതിരെ മുദ്രാവാക്യം വിളിച്ച് പ്രതിഷേധിച്ചത് വലിയ വാര്ത്തയായിരുന്നു. പ്രവര്ത്തകര് മുദ്രാവാക്യം വിളിക്കുന്നതും ഇ പി ജയരാജന് അവരെ തളളിവീഴ്ത്തുന്നതുമായ ദൃശ്യങ്ങള് പുറത്തുവന്നിരുന്നു. യൂത്ത് കോണ്ഗ്രസ് പ്രവര്ത്തകരായ ഫര്സീന് മജീദിനും നവീന് കുമാറിനും സുനിത് നാരായണനുമെതിരെ പൊലീസ് കേസെടുത്തു. എന്നാല് ഇ പി ജയരാജനെതിരെ കേസെടുക്കണമെന്ന കോണ്ഗ്രസിന്റെ ആവശ്യം മുഖ്യമന്ത്രിയും പൊലീസും തളളുകയായിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, വിമാനത്തിനുളളില് മുഖ്യമന്ത്രിയെ വധിക്കാന് ശ്രമം നടന്നെന്ന കേസില് യൂത്ത് കോണ്ഗ്രസ് നേതാവും മുന് എം എല് എയുമായ കെ എസ് ശബരീനാഥന് പൊലീസ് നോട്ടീസയച്ചു. വധശ്രമത്തിന് ഗൂഢാലോചന നടത്തിയതിനെക്കുറിച്ചുളള അന്വേഷണത്തിന്റെ ഭാഗമായാണ് ചോദ്യംചെയ്യല്. നാളെ രാവിലെ 11 മണിക്ക് തിരുവനന്തപുരം ശംഖുമുഖം അസി. കമ്മീഷണറുടെ ഓഫീസില് ഹാജരാകാനാണ് ആവശ്യപ്പെട്ടിരിക്കുന്നത്. യൂത്ത് കോണ്ഗ്രസിന്റെ ഒരു വാട്ട്സാപ്പ് ഗ്രൂപ്പില് മുഖ്യമന്ത്രിക്കെതിരെ പ്രതിഷേധിക്കാനുളള സാധ്യതയെക്കുറിച്ച് ശബരീനാഥന് സംസാരിക്കുന്നതിന്റെ സ്ക്രീന്ഷോട്ട് സമൂഹമാധ്യമങ്ങളില് പ്രചരിച്ചിരുന്നു.