ബംഗളുരു: കര്ണാടകയിലെ വര്ഗീയ സംഘര്ഷങ്ങള് അവസാനിപ്പിക്കാന് ആഹ്വാനം ചെയ്ത് കര്ണാടക മുന് മുഖ്യമന്ത്രിയും ബിജെപി നേതാവുമായ ബി എസ് യെദ്യൂരപ്പ. മുസ്ലീം ജനതയെ സമാധാനത്തോടെയും അന്തസ്സോടെയും ജീവിക്കാന് അനുവദിക്കണമെന്നും മുസ്ലീങ്ങളെയും അവരുടെ ഉടമസ്ഥതയിലുളള കച്ചവട സ്ഥാപനങ്ങളെയും ലക്ഷ്യംവെച്ചുളള ആക്രമണങ്ങള് അവസാനിപ്പിക്കണമെന്നും അദ്ദേഹം ആവശ്യപ്പെട്ടു. കര്ണാടകയിലെ ധാര്വാഡില് മുസ്ലീം കച്ചവടക്കാരുടെ പഴവണ്ടികള് തകര്ത്ത സംഭവത്തില് നാല് ശ്രീരാമസേന പ്രവര്ത്തകരെ അറസ്റ്റ് ചെയ്തതിനുപിന്നാലെയാണ് യെദ്യൂരപ്പയുടെ പ്രതികരണം.
'ഹിന്ദുക്കളും മുസ്ലീങ്ങളുമെല്ലാം ഒരമ്മ പെറ്റ മക്കളെപ്പോലെ ജീവിക്കുന്നത് കാണാനാണ് എനിക്ക് ആഗ്രഹം. പക്ഷേ ചില കുബുദ്ധികള് അതിന് എതിരുനില്ക്കുകയാണ്. അവര്ക്കെതിരെ കര്ശന നടപടിയെടുക്കുമെന്ന് മുഖ്യമന്ത്രി ബസവരാജ് ബൊമ്മെ ഉറപ്പുനല്കിയിട്ടുണ്ട്. ഇത്തരം വര്ഗീയ അക്രമങ്ങള് നടത്തുന്നവരോട് എനിക്ക് പറയാനുളളത് ഇതാണ്, ഇനിയെങ്കിലും ഇത്തരം അസുഖകരമായ സംഭവങ്ങള് ഉണ്ടാകരുത്. നമ്മള് ഒറ്റക്കെട്ടായി നില്ക്കേണ്ടവരാണ്'-യെദ്യൂരപ്പ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കര്ണാടകയില് ഹിജാബിനെതിരെ ഹിന്ദുത്വവാദികള് നടത്തുന്ന പ്രചാരണങ്ങളെ പരസ്യമായി വിമര്ശിച്ച ആദ്യത്തെ ബിജെപി നേതാവാണ് യെദ്യൂരപ്പ. സ്കൂളുകളിലും കോളേജുകളിലും ഹിജാബ് നിരോധിക്കണം, ക്ഷേത്രങ്ങള്ക്ക് സമീപമുളള മുസ്ലീം വ്യാപാര സ്ഥാപനങ്ങള് നിരോധിക്കണം, ഹലാല് ഭക്ഷണം ബഹിഷ്കരിക്കണം, മുസ്ലീം കരകൗശല വിഗ്ദര് നിര്മ്മിച്ച വിഗ്രഹങ്ങള് ഉപയോഗിക്കരുത്, മുസ്ലീങ്ങള് ഓടിക്കുന്ന ഓട്ടോകളിലും ടാക്സികളിലും കയറരുത്, പളളികളിലെ ഉച്ചഭാഷിണികള് നിരോധിക്കണം തുടങ്ങി മുസ്ലീം ജനതയ്ക്കെതിരെ വലിയ തോതിലുളള ആഹ്വാനങ്ങളാണ് ഹിന്ദുത്വ വാദികളും ഹിന്ദു സംഘടനകളും നടത്തുന്നത്.