തിരുവനന്തപുരം: രണ്ടാം പിണറായി സര്ക്കാരിന്റെ ഒന്നാം വാര്ഷികാഘോഷ പരിപാടികളില് പങ്കെടുക്കില്ലെന്ന് പ്രതിപക്ഷ നേതാവ് വി ഡി സതീശനും പ്രതിപക്ഷ ഉപ നേതാവ് പി കെ കുഞ്ഞാലിക്കുട്ടിയും. ഇന്ന് വൈകുന്നേരം കണ്ണൂരില് നടക്കുന്ന പരിപാടിയിലേക്ക് വി ഡി സതീശനും പി കെ കുഞ്ഞാലിക്കുട്ടിക്കും ക്ഷണമുണ്ടായിരുന്നു. എന്നാല് സില്വര് ലൈന് കെ റെയില് പ്രതിഷേധം നടക്കുന്ന സാഹചര്യത്തില് സര്ക്കാരിന്റെ പരിപാടികളില് പങ്കെടുക്കേണ്ടതില്ല എന്നാണ് കോണ്ഗ്രസിന്റെ നിലപാട്. മറ്റു ജില്ലകളില് പരിപാടിയിലേക്ക് ക്ഷണംകിട്ടിയ യുഡിഎഫ് പ്രതിനിധികള്ക്ക് യുക്തിയനുസരിച്ച് തീരുമാനമെടുക്കാമെന്നും കോണ്ഗ്രസ് വ്യക്തമാക്കി.
സര്ക്കാരിന്റെ പരിപാടികളില് പങ്കെടുക്കേണ്ടതില്ലെന്ന പ്രതിപക്ഷനേതാവിന്റെയും കോണ്ഗ്രസ് നേതൃത്വത്തിന്റെയും നിലപാടാണ് ശരിയെന്ന് പി കെ കുഞ്ഞാലിക്കുട്ടി പറഞ്ഞു. ഗവണ്മെന്റിന്റെ വാര്ഷികാഘോഷ പരിപാടികളില് പങ്കെടുക്കാതിരിക്കുന്ന ഇത് ആദ്യത്തെ സംഭവമല്ല. ഔദ്യോഗികമായി തീരുമാനിച്ചാല് പരിപാടിയില് പങ്കെടുക്കും. ഇല്ലെങ്കില് പങ്കെടുക്കില്ല. കെ റെയിലുമായി ബന്ധപ്പെട്ട കല്ലിടല് ജനങ്ങള്ക്ക് വലിയ വേദനയാണുണ്ടാക്കുന്നത്. അത് മനസിലാക്കി സര്ക്കാര് കല്ലിടല് ഒഴിവാക്കേണ്ടതായിരുന്നു-കുഞ്ഞാലിക്കുട്ടി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
രണ്ടാം പിണറായി സര്ക്കാരിന്റെ ഒന്നാം വാര്ഷികാഘോഷത്തിന്റെ സംസ്ഥാനതല ഉദ്ഘാടനം കണ്ണൂരില്വെച്ചാണ് നടക്കുന്നത്. മുഖ്യമന്ത്രി പിണറായി വിജയനാണ് പരിപാടികളുടെ ഉദ്ഘാടനം നടത്തുന്നത്. മെയ് 20 വരെ നീളുന്ന വാര്ഷികാഘോഷ പരിപാടികളാണ് സംഘടിപ്പിക്കുന്നത്. കണ്ണൂര്, കോഴിക്കോട്, കൊച്ചി, തിരുവനന്തപുരം ജില്ലകളില് അതിവിപുലമായ പരിപാടികളാണ് സര്ക്കാര് തീരുമാനിച്ചിരിക്കുന്നത്. മെയ് 20-ന് തിരുവനന്തപുരത്തുവെച്ചായിരിക്കും വാര്ഷികാഘോഷ പരിപാടികളുടെ സമാപനം.