കാസര്ഗോഡ്: കാസര്ഗോഡ് സംഘടിപ്പിച്ച റിപബ്ലിക്ക് ദിനാഘോഷത്തില് ദേശീയ പതാക തലതിരിച്ച് ഉയര്ത്തി മന്ത്രി അഹമ്മദ് ദേവര്കോവില്. മുനിസിപ്പല് സ്റ്റേഡിയത്തിലാണ് സംഭവം. പതാക ഉയര്ത്തി സല്യൂട്ട് അടിച്ചതിന് ശേഷമാണ് അബദ്ധം മനസിലായത്. മധ്യമ പ്രവര്ത്തകരാണ് പതാക തലതിരിഞ്ഞ് പോയത് ചൂണ്ടിക്കാട്ടിയത്. തുടര്ന്ന് പതാക അഴിച്ച് ശരിയായ രീതിയില് കെട്ടി ഉയര്ത്തുകയും ചെയ്തു. സംഭവത്തെക്കുറിച്ച് അന്വേഷിച്ച് ഉടന് റിപ്പോര്ട്ട് സമര്പ്പിക്കാന് പൊലീസ് മേധാവിയോട് കളക്ടറുടെ ചാര്ജുള്ള എ.ഡി.എം ഉത്തരവിട്ടു. കുറ്റക്കാര്ക്കെതിരെ നടപടി ഉണ്ടാകുമെന്നും എ.ഡി.എം അറിയിച്ചു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഇത് അദ്യമായല്ല സംസ്ഥാനതല നേതാക്കള് ദേശീയ പതാക തല കീഴായി ഉയര്ത്തുന്നത്. കഴിഞ്ഞ സ്വാതന്ത്ര്യദിനത്തില് ബിജെപി സംസ്ഥാന അധ്യക്ഷന് കെ. സുരേന്ദ്രനും ദേശീയ പതാക തലകീഴായി ഉയര്ത്തിയിരുന്നു. ബിജെപി സംസ്ഥാന കമ്മിറ്റി ഓഫീസായ മാരാര്ജി ഭവനില് ഭവനില് പതാകയുയര്ത്തിയപ്പോഴാണ് സംഭവം നടന്നത്. പതാക ഉയര്ത്തി കഴിഞ്ഞ് സഹപ്രവര്ത്തകര് ഭാരത് മാതാ കീ ജയ് വിളിച്ചതിന് ശേഷമാണ് നേതൃത്വത്തിന് അന്നും അബദ്ധം മനസിലായത്. ദേശീയ പതാകയുടെ മുകളില് വരേണ്ട കുങ്കുമം താഴെ വരുന്ന രീതിയിലാണ് പതാക ഉയര്ത്തിയത്.
അതേസമയം, സംസ്ഥാനത്തെ റിപ്പബ്ലിക് ദിനാഘോഷങ്ങളുടെ ഭാഗമായി സെൻട്രൽ സ്റ്റേഡിയത്തിൽ ഗവർണർ ആരിഫ് മുഹമ്മദ് ഖാൻ പതാക ഉയർത്തി. കൊവിഡ് വ്യാപനത്തിന്റെ പശ്ചാത്തലത്തിൽ പരിമിതമായ ആഘോഷങ്ങള് മാത്രമേ സംഘടിപ്പിച്ചിരുന്നുള്ളൂ. ചടങ്ങിലേക്ക് പൊതുജനങ്ങൾക്ക് പ്രവേശനമുണ്ടായിരുന്നില്ല.