ഡല്‍ഹി: ഒമിക്രോണ്‍ ബാധിച്ചവരുടെ എണ്ണം നൂറുകടന്നെന്ന് കേന്ദ്രസര്‍ക്കാര്‍. രാജ്യത്തെ പതിനൊന്ന് സംസ്ഥാനങ്ങളിലും കേന്ദ്രഭരണപ്രദേശങ്ങളിലുമായി 113 പേര്‍ നിലവില്‍ ഒമിക്രോണ്‍ ബാധിതരാണെന്നും ജനങ്ങള്‍ അതീവ ജാഗ്രത പാലിക്കണമെന്നും കേന്ദ്രസര്‍ക്കാര്‍ അറിയിച്ചു. അനാവശ്യമായ യാത്രകളും ഒത്തുകൂടലുകളും ഒഴിവാക്കാനും നിര്‍ദേശമുണ്ട്. കഴിഞ്ഞ ഇരുപത് ദിവസത്തിലേറെയായി രാജ്യത്തെ കൊവിഡ് കേസുകളുടെ എണ്ണം പതിനായിരത്തില്‍ താഴെയാണ്. എങ്കിലും ഒമിക്രോണ്‍ ആശങ്ക നിലനില്‍ക്കുന്നതിനാല്‍ കനത്ത ജാഗ്രത പാലിക്കേണ്ടതുണ്ടെന്നും കേന്ദ്രം വ്യക്തമാക്കി.
ഡെല്‍റ്റ വേരിയന്റിനേക്കാള്‍ വേഗത്തിലാണ് ഒമിക്രോണ്‍ പടരുന്നത്. രാജ്യത്ത് ക്രിസ്മസ് ന്യൂഇയര്‍ ആഘോഷങ്ങള്‍ക്ക് ശേഷം രോഗബാധ കൂടാന്‍ സാധ്യതയുളളതിനാല്‍ പൊതു ഇടങ്ങളില്‍ പരമാവധി ഒത്തുചേരുന്നത് ഒഴിവാക്കണമെന്ന് ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് ( ഐ സി എം ആര്‍) ഡയറക്ടര്‍ ജനറല്‍ ബല്‍റാം ഭാര്‍ഗവ ആവശ്യപ്പെട്ടു. കേരളത്തിലെയും മണിപ്പൂരിലെയുമടക്കം രാജ്യത്തെ 24 ജില്ലകളില്‍ നിയന്ത്രണം കടുപ്പിക്കണമെന്നും അദ്ദേഹം പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കേരളത്തിലെ തിരുവനന്തപുരം, കോട്ടയം, ഇടുക്കി, കോഴിക്കോട്, എറണാകുളം, കൊല്ലം, വയനാട്, കണ്ണൂര്‍, പത്തനംതിട്ട എന്നീ ജില്ലകളിലും മിസോറാമിലെ ഖൗസാള്‍, സെര്‍ച്ചിപ്പ്, ചമ്പായി, മമിത്, ഹ്നാഗ്തിയാല്‍, ലുങ്‌ലെയ്, ഐസ്വാള്‍, ലാങ്ടായ് എന്നീ ജില്ലകളിലുമാണ് അതീവജാഗ്രതാ നിര്‍ദേശം നല്‍കിയിട്ടുളളത്. ജനങ്ങള്‍ ഒമിക്രോണിനെ സാധാരണയായി കണ്ട് തളളിക്കളയുന്നത് ആശങ്കയുണ്ടാക്കുന്നുണ്ടെന്നും പുതിയ വകഭേദം വളരെ പെട്ടന്ന് സമൂഹവ്യാപനമുണ്ടാക്കാന്‍ ശേഷിയുളളതാണെന്നും ബല്‍റാം ഭാര്‍ഗവ കൂട്ടിച്ചേര്‍ത്തു.
