ഛണ്ഡീഗഢ്: കര്‍ഷക പ്രക്ഷോഭ രക്തസാക്ഷികള്‍ക്ക് സ്മാരകം പണിയുമെന്ന് പഞ്ചാബ് മുഖ്യമന്ത്രി ചരണ്‍ജിത് സിങ് ചന്നി. വിവാദമായ കാര്‍ഷിക നിയമങ്ങള്‍ പിന്‍വലിക്കുമെന്ന പ്രധാനമന്ത്രി നരേന്ദ്ര മോദിയുടെ പ്രഖ്യാപനത്തിന് പിന്നാലെയാണ് സ്മാരകം പണിയുമെന്ന് ചന്നി അറിയിച്ചത്. സ്ഥലവും മറ്റ് കാര്യങ്ങളെക്കുറിച്ചും കര്‍ഷകരുമായി ആലോചിച്ച് തീരുമാനം എടുക്കുമെന്നും മുഖ്യമന്ത്രി കൂട്ടിച്ചേര്‍ത്തു. സമരത്തിനിടെ ജീവന്‍ നഷ്‌ടമായ 700 ലധികം കുടുംബങ്ങള്‍ക്ക് നഷ്ടപരിഹാരം നല്‍കാന്‍ കേന്ദ്രസര്‍ക്കാര്‍ തയ്യാറാകണമെന്നും ചരണ്‍ജിത് സിങ് ചന്നി ആവശ്യപ്പെട്ടു.
റിപ്പബ്ലിക് ദിനത്തില്‍ കര്‍ഷകരുടെ റാലിയിലുണ്ടായ സംഘര്‍ഷത്തില്‍ അറസ്റ്റിലായ കര്‍ഷകര്‍ക്ക് കഴിഞ്ഞ ദിവസം പഞ്ചാബ് സര്‍ക്കാര്‍ ധനസഹായം പ്രഖ്യാപിച്ചിരുന്നു. ഡല്‍ഹി പൊലീസ് അറസ്റ്റ് ചെയ്ത 83 പേര്‍ക്കും രണ്ട് ലക്ഷം രൂപ വീതം ധനസഹായം നല്‍കുമെന്നാണ് പഞ്ചാബ് മുഖ്യമന്ത്രി ചരണ്‍ജിത് സിംഗ് ചന്നി അറിയിച്ചത്.കാര്‍ഷിക നിയമങ്ങള്‍ക്കെതിരെ പ്രതിഷേധിച്ച കര്‍ഷകര്‍ക്കെതിരെ ചുമത്തിയ കേസുകള്‍ പിന്‍വലിക്കാനും നേരത്തെ ചരണ്‍ജിത് സിങ് ചന്നി തീരുമാനിച്ചിരുന്നു. വായുമലിനീകരണം ഉണ്ടാകുന്ന രീതിയില്‍ വൈക്കോല്‍ കത്തിച്ചതിന്‍റെ പേരില്‍ എടുത്ത കേസുകളും പിന്‍വലിക്കും.
