ചെന്നൈ: രാഷ്ട്രീയനേതാക്കള്‍ക്കെതിരായ മാനനഷ്ടക്കേസുകള്‍ കൂട്ടത്തോടെ പിന്‍വലിച്ച് തമിഴ്‌നാട് മുഖ്യമന്ത്രി എം. കെ. സ്റ്റാലിന്‍. 2012-നും-2021-നും ഇടയില്‍ എ.ഐ.എ.ടി.എം.കെ. അധികാരത്തിലിരുന്ന കാലത്ത് രാഷ്ട്രീയനേതാക്കള്‍ക്കെതിരെ ചുമത്തിയ മാനനഷ്ടക്കേസുകള്‍ പിന്‍വലിക്കാനാണ് സ്റ്റാലിന്‍ ഉത്തരവിട്ടത്. 130 രാഷ്ട്രീയനേതാക്കള്‍ക്കെതിരായ കേസുകളാണ് ഇതോടെ ഒഴിവാകുന്നത്. നിലവില്‍ നടന്നുകൊണ്ടിരികുന്ന കേസുകളിലെ നടപടികള്‍ നിര്‍ത്തിവയ്ക്കാനും അദ്ദേഹം നിര്‍ദേശിച്ചു.
മുഖ്യമന്ത്രി എം.കെ. സ്റ്റാലിന്റെ ഈ നീക്കം ഡി.എം.കെ, കോണ്‍ഗ്രസ്, ഇടതുപക്ഷം, ഡിഎംഡികെ തുടങ്ങിയ പാര്‍ട്ടികളുടെ നേതാക്കള്‍ക്ക് ഗുണം ചെയ്യും. ഡിഎംഡികെ മേധാവി വിജയകാന്ത്, ഭാര്യ പ്രേമലത, തമിഴ്‌നാട് കോണ്‍ഗ്രസ് അധ്യക്ഷന്‍ ഇവികെഎസ് ഇളങ്കോവന്‍, ഡിഎംകെ എംപി കനിമൊഴി, ദയാനിധി മാരന്‍ എന്നിവരുടെ പേരിലുളള മാനനഷ്ടക്കേസുകളും ഇതോടെ ഒഴിവാകും.
നേരത്തെ മാധ്യമപ്രവര്‍ത്തകര്‍ക്കും ചാനലുകള്‍ക്കും ദിനപത്രങ്ങള്‍ക്കുമെതിരായ മാനനഷ്ടക്കേസുകള്‍ പിന്‍വലിക്കാനും എം.കെ. സ്റ്റാലിന്‍ ഉത്തരവിട്ടിരുന്നു. അധികാരത്തിലെത്തിയാല്‍ മാധ്യമപ്രവര്‍ത്തകര്‍ക്കെതിരെ ചുമത്തിയ വ്യാജ മാനനഷ്ടക്കേസുകള്‍ പിന്‍വലിക്കുമെന്ന് ഡിഎംകെ തെരഞ്ഞെടുപ്പ് പ്രചരണവേളയില്‍ പ്രഖ്യാപിച്ചിരുന്നു.
