ഹൈദരാബാദ്: അഭിനേതാവെന്നതിനേക്കാള് വിവാദ പരാമര്ശങ്ങളിലൂടെയും പ്രവൃത്തികളിലൂടെയും സുപരിചിതനാണ് തെലുങ്ക് നടന് നന്ദമൂരി ബാലകൃഷ്ണ. ഇപ്പോള് ഭാരതത്തിന്റെ പരമോന്നത സിവിലിയന് ബഹുമതിയായ ഭാരത് രത്നയ്ക്കെതിരെയും എ. ആര്. റഹ്മാനെതിരെയും നടന് നടത്തിയ പരാമര്ശങ്ങളും വിവാദത്തിലായിരിക്കുകയാണ്. ഒരു പ്രാദേശിക ചാനലിന് നല്കിയ അഭിമുഖത്തിലാണ് നന്ദമൂരി ബാലകൃഷ്ണയുടെ വിവാദ പരാമര്ശങ്ങള്.
'എ. ആര്. റഹ്മാന് എന്നൊരാള് ഓസ്കാര് വാങ്ങിയതായി കേട്ടു. റഹ്മാന് ആരാണെന്നുപോലും തനിക്കറിയില്ല. ഭാരത് രത്ന പുരസ്കാരമെല്ലാം തന്റെ അച്ഛന് എന് ടി ആറിന്റെ കാലിലെ നഖത്തിനുതുല്യമാണ്. തെലുങ്ക് സിനിമാ മേഖലയ്ക്ക് തന്റെ കുടുംബം നല്കിയ സംഭാവനയ്ക്ക് തുല്യമല്ല മറ്റൊന്നും' എന്നായിരുന്നു നന്ദമൂരി ബാലകൃഷ്ണ അഭിമുഖത്തില് പറഞ്ഞത്.
ബാലകൃഷ്ണ സ്വയം ഹോളിവുഡ് സംവിധായകന് ജയിംസ് കാമറൂണിനോടും ഉപമിക്കുന്നുണ്ട്. സിനിമയുടെ ഷൂട്ടിംഗ് വേഗം തീര്ക്കാനാണ് താന് ശ്രമിക്കുക. ജയിംസ് കാമറൂണിനെപ്പോലെ വര്ഷങ്ങള് വലിച്ചുനീട്ടില്ല. കുറച്ച് സമയത്തിനുളളില് കൂടുതല് ഹിറ്റ് സിനിമകള് ഉണ്ടാക്കുക എന്നതാണ് തന്റെ വര്ക്കിംഗ് സ്റ്റൈല് എന്നും നന്ദമൂരി ബാലകൃഷ്ണ പറഞ്ഞു.