ഓലയുടെ ഇലക്ട്രിക്ക് സ്കൂട്ടറിന് ഇന്ത്യയിൽ റെക്കോഡ് ബുക്കിംഗ്. 24 മണിക്കൂറിനിടെ ഒരു ലക്ഷത്തിൽ അധികം പേരാണ് സ്കൂട്ടർ ബുക്ക് ചെയ്തത്. ജൂലൈ 15 നാണ് ഓലയുടെ ബുക്കിംഗ് ആരംഭിച്ചത്. ലോകത്തിൽ ഇന്നേവരെ പുതുതായി അവതരിപ്പിച്ച ഒരു വാഹനത്തിന് ലഭിക്കുന്ന ഏറ്റവും കൂടിയ ബുക്കിംഗാണ് ഇത്. ഓലയുടെ വെബ്സൈറ്റ് വഴിയാണ് ബുക്കിംഗ് നടക്കുന്നത്. olaelectric.com വഴി 499 രൂപയ്ക്ക് സ്കൂട്ടർ ബുക്ക് ചെയ്യാം.
ഓലയുടെ ആദ്യത്തെ ഇലക്ട്രിക് വാഹനത്തിന് ഇന്ത്യയിലെ ഉപഭോക്താക്കളിൽ നിന്ന് ലഭിച്ച മികച്ച പ്രതികരണം ഏറെ ആവേശം നൽകുന്നതായി ഓല ചെയർമാനും ഗ്രൂപ്പ് സിഇഒയുമായ ഭവിഷ് അഗർവാൾ പ്രസ്താവനയിൽ പറഞ്ഞു. ഉപഭോക്താക്കൾ ഇലക്ട്രോണിക്ക് വാഹനങ്ങളിലേക്ക് മാറുന്നതിന്റെ സൂചനയാണ് ഇതെന്നും അഗർവാൾ അഭിപ്രായപ്പെട്ടു. ഇത് ഒരു തുടക്കം മാത്രമാണ്. ഓലയുടെ ഇലക്ട്രോണിക്ക് വിപ്ലവത്തിൽ പങ്കുചേർന്ന് എല്ലാവർക്കും നന്ദി പറയുന്നതായും അദ്ദേഹം പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
മികച്ച വേഗത, നിരവധി വേരിയന്റുകൾ, കൂടിയ ബൂട്ട് സ്പേസ്, നൂതന സാങ്കേതികവിദ്യ എന്നിവയാണ് ഓല ഇലക്ട്രിക്കിന്റെ പ്രത്യേകതയായി കമ്പനി ചൂണ്ടിക്കാട്ടുന്നത്. സ്കൂട്ടറിന്റെ വില ഇതുവരെ പുറത്തുവിട്ടിട്ടില്ല. വിപണയിൽ ഇടം കണ്ടെത്തുന്നതിനായി ഏറ്റവും കുറഞ്ഞ വിലക്ക് തുടക്കത്തിൽ സ്കൂട്ടർ ലഭ്യമാക്കും. വിദേശങ്ങളിലേക്ക് കയറ്റുമതി ചെയ്യുന്ന സ്കൂട്ടറിന്റെ നിർമാണം പൂർണമായും ഇന്ത്യയിലായിരിക്കും. ഇതിനായി അത്യാധുനിക സംവിധാനങ്ങളുള്ള പ്ലാന്റിന്റെ നിർമാണം പൂർത്തിയായിട്ടുണ്ട്. പ്രതിവർഷം 10 ദശലക്ഷം സ്കൂട്ടർ നിർമിക്കുകയാണ് കമ്പനിയുടെ ലക്ഷ്യം.